གཉིས་པ་ལྟ་བས་བསྒྱུར་བ་ནི། འཁྲུལ་སྣང་སྐུ་བཞིར་ལྟ་བ་ཡི། །ཞེས་སོགས་ཀྱི་གཞུང་འདི་ཡིན་ཞིང༌། འདི་ནི་སྔ་རབས་པའི་ལུགས་ཡིན་པས། རང་རེས་བརྟགས་ན་ཅུང་མི་བདེ་སྟེ། སྡུག་བསྔལ་གང་བྱུང་ཡང་དེའི་ངོ་བོ་ལ་བལྟས་ན། དང་པོ་གང་ནས་མ་སྐྱེས་པ་ཆོས་སྐུ་སོགས་གསུངས་མོད། གནད་ཆེ་བ་ཙམ་མི་སྣང་བས། མདོར་ན་རང་ལ་བདེ་སྡུག་དང་རྐྱེན་བཟང་ངན་ཅི་བྱུང་ཡང་རང་རང་གི་ངོ་བོ་ལ་དཔྱད་དེ་རྒྱུ་རྐྱེན་རྟེན་འབྲེལ་ཚོགས་ཙམ་ལས་རྐྱེན་བཟང་ངན་དང་བདེ་སྡུག་ཅེས་ཐ་སྙད་ཙམ་མངོན་སུམ་བསྙོན་མེད་དུ་སྣང་བ་ལས་དོན་དུ་ངོ་བོས་མ་གྲུབ་པ་དང༌། ང་དང་གཞན་ཞེས་པ་བདེན་པར་མེད་ཚུལ་ལ་བལྟས་ནས་ཡིད་མི་བདེ་བ་དང་ཆགས་པ་སོགས་དགག་པས་ཆོག །ལྟ་བ་མ་ཤེས་ན། ད་ལྟ་རང་ཉིད་ལ་སྐྱིད་སྡུག་ཅི་བྱུང་ཐམས་ཅད་རང་འཆི་བའི་སྐབས་རྨི་ལམ་རྨིས་པ་ལྟར་དྲན་པའི་ཡུལ་ཙམ་དུ་འགྱུར་བས་ད་ལྟ་ཚེ་ཐུང་ཡུད་ཙམ་འདིར་ཆགས་སྡང་བྱེད་དོན་མི་འདུག་སྙམ་པ་དགོས་གསུངས།
༈ ཉིན་བཅུ་དགུ་པར།
བྱམས་པའི་སྨོན་ལམ་ལས། ངན་འགྲོའ་ིལམ་ནི་བཟློག་བགྱིད་ཅིང༌། །ཞེས་སོགས་ལས་བརྩམས་པའི་སྔོན་འགྲོ་ཀུན་སློང་འཆོས་པ་མདོར་བསྡུས་ཤིག་མཛད་ནས། སྔོན་དུ་ཇི་ལྟར་སོང་བའི་ས་བཅད་རྣམས་གསུངས་རྗེས། བདག་གཞན་བརྗེ་བའི་ཚུལ་དང༌། དེ་ལ་བརྟེན་ནས་གཏོང་ལེན་བསྒོམ་ཚུལ་གཉིས་ལ་བསྐྱར་བཤད་དང༌། དོན་ཚན་བདུན་ལས། དང་པོ་གཉིས་ལའང་བསྐྱར་བཤད་དང་འབྲེལ། དེ་ལྟར་གཅེས་པར་འཛིན་པའི་བློ་དང༌། ཡལ་བར་འདོར་བའི་བློ་གཉིས་པོ་དེ་གང་ལ་བསྐྱེད་པའི་གཞི། རང་དང་གཞན་གོ་ས་བརྗེ་བའམ་སྤོས་ནས། དེའི་རྗེས་སུ་གོང་འཕེལ་དུ་བྱ་བའི་ཕྱིར་སྔར་ཞུས་པ་ལྟར་སྙིང་རྗེའི་དམིགས་པ་རྩལ་དུ་བཏོན་ནས་སྡུག་བསྔལ་ལེན་པ་དང༌། བྱམས་པའི་དམིགས་པ་རྩལ་དུ་བཏོན་ནས་ལུས་ལོངས་སྤྱོད་དགེ་རྩ་དང་བཅས་པ་བཏང་ཞིང༌། དེ་འབྱོངས་པ་ན་དབུགས་འགྲོ་འོང་ལ་གཏོང་ལེན་སྦྱར། དེ་མི་བརྗེད་པའི་ཕྱིར་དུ་སྤྱོད་ལམ་ཀུན་ཏུ་ཚིག་གིས་དྲན་པ་གསོ།
No comments:
Post a Comment