ལྔ་པ། དེ་ལ་བརྟེན་ནས་གཏོང་ལེན་བསྒོམ་ཚུལ་ནི།
སྙིང་རྗེའི་དམིགས་པ་རྩལ་དུ་བཏོན་ནས་ལེན་པ་དང༌། བྱམས་པའི་དམིགས་པ་རྩལ་དུ་བཏོན་ནས་གཏོང་བ་སྦྱང་བ་སྟེ། རྩ་བར། གཏོང་ལེན་གཉིས་པོ་སྤེལ་མར་སྦྱང༌། །ཞེས་གསུངས་ལ། འདི་ནི་སྔ་མའི་བསམ་པ་དེ་ཉིད་གོང་འཕེལ་དུ་བྱེད་པའོ། །གཏོང་བ་དང་ལེན་པ་གཉིས་ལས་སྔ་མ་སྔོན་དུ་བྱེད་པར་ཁྲིད་ཡིག་མང་པོ་ལས་འབྱུང་ཡང༌། ལག་ལེན་ལ་ཕྱི་མ་སྔོན་དུ་བྱ་ཞིང༌། གཏོང་བ་མི་བྱེད་པར་ལེན་པ་གཅིག་པུ་བྱེད་པའང་རུང༌། དང་པོར་སྡུག་བསྔལ་མ་བླངས་ན་བདེ་བ་བཏང་ཡང་མི་ཕན་པས་སྙིང་རྗེའི་དམིགས་པ་རྩལ་དུ་བཏོན་ནས་མ་སེམས་ཅན་ཐམས་ཅད་སྡུག་བསྔལ་དང་བྲལ་བར་བྱ་སྙམ་པའི་སྙིང་རྗེ་བསྐྱེད་ནས། དེའི་སྡུག་བསྔལ་ཐམས་ཅད་སྤུ་གྲིས་སྐྲ་བཞར་བ་ལྟར་འོད་ནག་པོའ་ིརྣམ་པར་རང་གི་སྙིང་གར་གཅེས་འཛིན་ལ་ཐིམ་པར་བསམ་ཞིང༌། རྒྱས་པར་ན། ཚ་དམྱལ་བའི་ཚ་བའི་སྡུག་བསྔལ་མེ་དང་བཅས་པ་རང་གི་སྙིང་གར་ཚ་འུབ་ཀྱིས་གཅེས་འཛིན་འགོང་པོར་ཐིམ་པར་བསམ། དེ་བཞིན་དུ་གྲང་དམྱལ་བ་དང༌། ཡི་དྭགས། དུད་འགྲོ། ལྷ་མིན། མི། ལྷ་སོགས་ནས་བྱང་སེམས་ས་བཅུ་པ་བ་མན་གྱི་སྡུག་བསྔལ་དང༌། སྡིག་སྒྲིབ་སོགས་རང་སྟེང་དུ་ལེན་པར་བསམས་ནས། སྡུག་བསྔལ་དང་བྲལ་ཞིང་སྡིག་སྒྲིབ་བྱང་བར་མོས་པ་དང༌། དེ་ལྟར་བདག་ལ་སྨིན་པར་གྱུར་ཅིག་ཅེས་ཀྱང་སྨོན། ལེན་པའི་སྐབས་བླ་མ་དང་སངས་རྒྱས་གཉིས་ལ་ལེན་དུ་མེད། གང་ཟག་གི་རིགས་ལ་བློའ་ིནུས་པ་མཐོ་དམན་ཅན་མང་བས་ན། ལས་དང་པོ་བ་ཁ་ཅིག་གཏོང་ལེན་སྒོམ་པ་མི་ནུས་པའང་འབྱུང་བས། དེ་ལྟ་བུའི་རིགས་ལ། ལེན་པའི་གོ་རིམ་རང་ནས་བརྩམས། །ཞེས་པ་ལྟར་རང་ལ་ཕྱི་དྲོ་འོང་རྒྱུའི་སྡུག་བསྔལ་དེ་སྔ་དྲོ་ལ་ལེན་ཅིང་བསྒོམ། དེ་ནས་སང་གི་དེ་དེ་རིང་ལ་ལེན་པ་དང༌། དེ་ནས་ཟླ་བ་རྗེས་མའི་དང༌། ལོ་རྗེས་མའི་དང༌། མི་ཚེ་འདི་དང༌། སྐྱེ་བ་ཕྱི་མ། ཚེ་རབས་གཏན་དང༌། ཕ་མ། ཉེ་འབྲེལ། བར་མ། དགྲ་སོགས་དང༌། སེམས་ཅན་ཐམས་ཅད་ཀྱི་བར་སྦྱང་སྟེ༑ སྔ་མ་སྔ་མ་ལ་འབྱོངས་པ་ན། ཕྱི་མ་ཕྱི་མ་ལ་དམིགས་པ་སྤོས་ཀྱིན་སྡུག་བསྔལ་སྡིག་སྒྲིབ་སོགས་རང་སྟེང་དུ་བླང༌། དེ་ལྟར་གོ་རིམ་འདི་བཞིན་དུ་བྱས་ནས་སྦྱོང་དགོས་ཀྱི། དང་པོ་ནས་དགྲ་སོགས་ཀྱི་སྡིག་སྡུག་ལེན་བློ་མི་འབྱུང༌། དེས་ན་སྐབས་རེར་རང་ནས་ཕར་བརྩམས་ནས་དེ་ལྟར་བསྒོམ། སྐབས་རེར་དམྱལ་བ་ནས་བྱང་སེམས་ས་བཅུ་པ་བའི་བར་དང༌། སྐབས་རེར་ལུང་པའི་ཕུ་ནས་མར་དང༌། སྐབས་རེ་མདའ་ནས་ཡར་རིམ་འདེད་ཀྱིས་དེ་ལྟར་བསྒོམ། ཐ་ན་ཁྱི་ལ་རྡོ་བརྒྱབ་པའི་སྡུག་བསྔལ་ཚུན་བླང༌། བླངས་པ་དེ་ཉིད་ཀྱང་ཡལ་བའམ། འགྲམ་དུ་བཞག་པ་ལྟ་བུ་མིན་པར། སྙིང་གི་དབུས་སུ་ལེན། དེ་དག་གི་ཚེ་འཇིགས་དངངས་སྐྱེས་ན་ལེགས་པ་ཡིན། དེ་ལྟར་བསམས་ན། དངོས་སུ་ལེན་མ་ནུས་ཀྱང་བསོད་ནམས་ཀྱི་ཚོགས་རླབས་པོ་ཆེ་རྫོགས་པ་དང༌། བློ་གོམས་ན་དངོས་སུ་ལེན་ནུས་པའང་འབྱུང་བ་བྱམས་པའི་རྣལ་འབྱོར་པའི་ལོ་རྒྱུས་ལྟར་ཡིན་གསུངས།
No comments:
Post a Comment