བདག་རྐྱེན་ཡིད་དབང་ལ་བརྟེན་ནས། །བྱུང་བའི་མངོན་སུམ་ཡིད་མངོན་ཏེ། །གཟུགས་འཛིན་ཡིད་མངོན་སོགས་ལྔ་ཡོད། །རྟོག་པ་དང་བྲལ་མ་འཁྲུལ་བའི། །འཛིན་རྣམ་རང་རིག་མངོན་སུམ་སྟེ། །དེ་གཉིས་ལ་ཡང་གོང་ལྟར་དུ། །ཚད་མ་ལ་སོགས་གསུམ་གསུམ་བཤད། །དེ་ལ་རྣལ་འབྱོར་མངོན་སུམ་ནི། །བདག་རྐྱེན་ཞི་ལྷག་ཟུང་འབྲེལ་གྱི། །ཏིང་འཛིན་བསྒོམས་སྟོབས་ལས་བྱུང་བའི། །འཕགས་པའི་རྒྱུད་ཀྱི་མངོན་སུམ་ཡིན། །རྟེན་གྱི་སྒོ་ནས་དབྱེ་ན་ནི། །ཉན་རང་ཐེག་ཆེན་འཕགས་པའི་གསུམ། །ངོ་བོའི་སྒོ་ནས་རེ་རེ་ལའང་། །མཐོང་སྒོམ་མི་སློབ་ལམ་དང་གསུམ། །ཡུལ་གྱི་སྒོ་ནས་གཉིས་ཡིན་ཏེ། །ཇི་ལྟ་ཇི་སྙེད་མཁྱེན་པ་འོ།
No comments:
Post a Comment