དེ་ཡང་རྟོག་བྲལ་མ་འཁྲུལ་བའི། །རིག་པ་མངོན་སུམ་གྱི་མཚན་ཉིད། །དབྱེ་ན་དབང་མངོན་ཡིད་མངོན་དང་། །རང་རིག་རྣལ་འབྱོར་མངོན་སུམ་བཞི། །འཁྲུལ་རྒྱུ་བཞི་སྟེ་རྟེན་དང་ཡུལ། །གནས་དང་དེ་མ་ཐག་རྐྱེན་ལའོ། །བདག་རྐྱེན་དབང་པོ་གཟུགས་ཅན་ལས། །བྱུང་བའི་མངོན་སུམ་དབང་མངོན་ཏེ། །དེ་ལ་གཟུགས་འཛིན་དབང་མངོན་ནས། །རེག་བྱ་འཛིན་པའི་དབང་མངོན་བར། །ལྔ་ཡོད་དེ་རྣམས་རེ་རེ་ལའང་། །ཚད་མ་དང་ནི་བཅད་ཤེས་དང་། །སྣང་ལ་མ་ངེས་པ་གསུམ་ཡོད། །བདག་རྐྱེན་ཡིད་དབང་ལ་བརྟེན་ནས། །བྱུང་བའི་མངོན་སུམ་ཡིད་མངོན་ཏེ། །གཟུགས་འཛིན་ཡིད་མངོན་སོགས་ལྔ་ཡོད། །རྟོག་པ་དང་བྲལ་མ་འཁྲུལ་བའི། །འཛིན་རྣམ་རང་རིག་མངོན་སུམ་སྟེ། །དེ་གཉིས་ལ་ཡང་གོང་ལྟར་དུ། །ཚད་མ་ལ་སོགས་གསུམ་གསུམ་བཤད། །དེ་ལ་རྣལ་འབྱོར་མངོན་སུམ་ནི། །བདག་རྐྱེན་ཞི་ལྷག་ཟུང་འབྲེལ་གྱི། །ཏིང་འཛིན་བསྒོམས་སྟོབས་ལས་བྱུང་བའི། །འཕགས་པའི་རྒྱུད་ཀྱི་མངོན་སུམ་ཡིན། །རྟེན་གྱི་སྒོ་ནས་དབྱེ་ན་ནི། །ཉན་རང་ཐེག་ཆེན་འཕགས་པའི་གསུམ། །ངོ་བོའི་སྒོ་ནས་རེ་རེ་ལའང་། །མཐོང་སྒོམ་མི་སློབ་ལམ་དང་གསུམ། །ཡུལ་གྱི་སྒོ་ནས་གཉིས་ཡིན་ཏེ། །ཇི་ལྟ་ཇི་སྙེད་མཁྱེན་པ་འོ།
No comments:
Post a Comment