༄༅། །རྫ་དཔལ་སྤྲུལ་གྱིས་མཛད་པའི་ཞལ་གདམས། །
བསྟོད་ན་མི་དགའ་སྨད་ན་དགའ། །
བསྟོད་ན་ང་རྒྱལ་ཁེངས་སེམས་ཆེ། །
སྨད་ན་རང་སྐྱོན་ཐེར་ལ་འབུད། །
མི་ཁ་ལྷ་ཡི་ཕ་འབབ་ཡིན། །
མཐོ་ན་མི་དགའ་དམའ་ན་དགའ། །
མཐོ་ན་ཕྲག་དོག་ང་རྒྱལ་སྐྱེ། །
དམའ་ན་བག་ཡངས་དགེ་སྦྱོར་འཕེལ། །
དམན་ས་གོང་མའི་གདན་ས་ཡིན། །
འབྱོར་ན་མི་དགའ་རྒུད་ན་དགའ། །
འབྱོར་ན་གསོག་སྲུང་སྡུག་བསྔལ་ཆེ། །
རྒུད་ན་དཀའ་སྤྱད་ལྷ་ཆོས་འགྲུབ། །
སྤྲང་ལུས་ཆོས་པའི་གཏད་སོ་ཡིན། །
བྱིན་ན་མི་དགའ་འཕྲོག་ན་དགའ། །
བྱིན་ན་ལན་ཆགས་ཁུར་པོ་འཕེལ། །
འཕྲོག་ན་ཚེ་རབས་བུ་ལོན་སོད། །
ཆོག་ཤེས་འཕགས་པའི་སྤྱི་ནོར་ཡིན། །
གཉེན་ལ་མི་དགའ་དགྲ་ལ་དགའ། །
གཉེན་གྱིས་ཐར་ལམ་བར་དུ་གཅོད། །
དགྲ་བོ་བཟོད་པའི་ཡུལ་དུ་བྱེད། །
རོ་སྙོམས་ཉམས་ལེན་གནད་འགག་ཡིན། །
ཆོས་བཞིན་མཛད་ན་དེ་འདྲ་དགོས། །
བློ་ཐག་ཆོད་ན་དེ་འདྲ་དགོས། །
རི་ཁྲོད་འཛིན་ན་དེ་འདྲ་དགོས། །
རྒྱལ་ཁམས་འགྲིམས་ན་དེ་འདྲ་དགོས། །
གཞན་ཡང༌། རྐྱེན་ངན་དགེ་བའི་བསྐུལ་མ་ཡིན། །ཞེས་པ་ལྟར་སྡུག་བསྔལ་མི་འདོད་ན་སྡིག་པ་སྤོངས་ཤིག་ཅེས་པའི་བརྡར་བསམས་ནས་ཚོགས་གསོག་སྒྲིབ་སྦྱོང་ལ་འབད། རང་རེ་ལ་རྐྱེན་ངན་པ་མ་བྱུང་ན་སྣང་བ་སྐྱིད་ཐག་ཆོད་པས་ཆོས་མི་དྲན་ལ། ཁ་ཉེས་གོད་ཁ་ན་ཚ་སོགས་རྐྱེན་ངན་པ་བྱུང་ན། དེས་ཡིད་འབྱུང་སྐྱེས་ནས་སྙོམ་ལས་ལས་བསླངས་ཏེ་དགེ་བར་འཇུག་པ་འོང༌། འདྲེ་གདོན་རྒྱལ་བའི་ཆོ་འཕྲུལ་ཡིན། །སྡུག་བསྔལ་ཆོས་ཉིད་ཀྱི་ཡོ་ལང་ཡིན། །ཞེས་པ་ལྟར་རྒྱལ་འགོང་འདྲེ་གདོན་སོགས་ཀྱི་གནོད་པ་བྱུང་ན། ངས་སྔོན་ཆོས་མ་དྲན་པར་འཇིག་རྟེན་ལ་མགོ་འཁོར་ནས་ཡོད་པ་ལ་ད་འདིས་ཆོས་ལ་བསྐུལ་བ་བཀའ་དྲིན་ཆེ་སྙམ་དུ་བསྒོམ། རང་གི་བློས་འཁྱེར་སྟངས་ཤེས་ན། སྡུག་བསྔལ་གྱིས་ཀྱང་ཆོས་ཉིད་རྟོགས་པའི་རྐྱེན་ལྟ་བུ་བྱེད་པ་སྲིད། ན་ཚ་སོགས་རང་གཅེས་འཛིན་ལས་བྱུང་བས། ནད་གདོན་རྣམས་རང་གི་དགྲ་བཏུལ་མ་ཐུབ་པའི་དགྲ་བོ་གཅེས་འཛིན་ཁོ་འདུལ་རོགས་བྱེད་མཁན་ཡིན་པས་དྲིན་ཆེ་སྙམ་པ་དགོས། རང་ཚོས་རྐྱེན་ངན་པ་ཞིག་བྱུང་སྐབས་ཉམས་ལེན་བསྐྱུར་རྐྱང་བྱེད་མོད། དེ་ལྟ་མི་བྱ་བར་དཔེར་ན། འགྲུལ་པས་འཕྲང་དོག་པོར་སླེབས་དུས་གཟབ་གཟབ་བྱེད་པ་ལྟར། ན་ཚ་རྐྱེན་ངན་སོགས་བྱུང་སྐབས་ལྷག་པར་གཟབ་སྟེ་ཉམས་ལེན་མི་བཤོལ་བར་གཏོང་ལེན་སོགས་ནན་ཏན་དུ་བྱེད་པ་གལ་ཆེ་གསུངས། སྤྱོད་འཇུག་ལས་གསུངས་པའི། གཞན་ཡང་སྡུག་བསྔལ་ཡོན་ཏན་ནི། །སྐྱོ་བས་དྲེགས་པ་སེལ་བར་བྱེད། །འཁོར་བ་པ་ལ་སྙིང་རྗེ་སྐྱེ། །སྡིག་ལ་འཛེམ་ཞིང་དགེ་ལ་དགའ། །ཞེས་སྡུག་བསྔལ་བྱུང་བ་ན་སྐྱོ་ནས་ང་རྒྱལ་སེལ་ཞིང་། རང་སྡུག་བསྔལ་བ་རྒྱུ་མཚན་དུ་བྱས་ནས་གཞན་ལ་སྙིང་རྗེ་བ་དང༌། དེའི་རྒྱུ་ལ་སྤོང་འདོད་སོགས་འབྱུང༌། རང་རེས་སྡུག་བསྔལ་བྱུང་བ་ལས། བདེ་ཞིང་སྐྱིད་པ་བྱུང་ན་ལེགས་པར་འཛིན་ཀྱང༌། དེ་ལྟ་མ་ཡིན་ཏེ། སྐྱིད་ན་མི་དགའ་སྡུག་ན་དགའ། །སྐྱིད་ན་སྔོན་བསགས་བསོད་ནམས་ཟད། །སྡུག་ན་ལས་ངན་སྡིག་སྒྲིབ་བྱང༌། །ཞེས་གསུངས་པས། གོ་ས་ལྟ་བུ་མཐོ་ན་རང་གཅིག་པུ་བཟང་བཙོན་དུ་བཅུག་པ་དང་འདྲ་བར་གང་འདོད་སར་འགྲོ་ས་མེད་པ་བླ་ཆེན་དཔོན་ཆེན་ཚོ་ལྟ་བུ་སྟེ། གྲུབ་མཆོག་བློ་བཟང་རྣམ་རྒྱལ་གྱིས་ཀྱང༌། མཐོ་ན་བཟང་བཙོན་དུ་འགྱུར་བར་གསུངས་པ་དང༌། དམན་ས་རྒྱལ་བའི་གདན་ས་ཡིན། །ཞེས་པ་ལྟར་སྔོན་གྱི་མཁས་གྲུབ་ཐམས་ཅད་དམན་ས་བཟུང་ནས་རྒྱལ་བའི་གོ་འཕང་དུ་གཤེགས་ཤིང༌། འབྲོམ་རིན་པོ་ཆེས་ཀྱང༌། ཞང་འཕྲང་ཀ་བེར་ཆུང་ལ་ཕྱག་འཚལ་བར་མཛད་པ་བཞིན། རང་རེའང་དམན་ས་བཟུང་ནས་འོག་ཏུ་འགྲོ་བ་ཆུ་ལས་མེད་པ་བྱེད་ན། གྲོགས་དང་ཡང་མཐུན་པ་འབྱུང་ཆེ། བསྟོད་ན་མི་དགའ་སྨད་ན་དགའ། །སྨད་ན་རང་སྐྱོན་ཐེར་ལ་འབུད། །ཅེས་པ་ལྟར་གཞན་གྱིས་བསྟོད་ར་བཏང་ན་ང་རྒྱལ་ཇེ་ཆེར་འགྱུར་ཞིང༌། དེས་འདི་ཕྱི་གཉིས་ཀར་ཕུང༌། རང་གི་སྐྱོན་མི་མཐོང་ལ༑ སྨད་ན་གནས་སྐབས་མི་སྙན་ཡང༌། ཕྱིས་ནས་རང་གི་ལས་དེ་ལ་བརྟགས་ནས་འདོར་ལེན་གཟབ་པར་བྱེད་པའང་འདིས་འབྱུང་ལ། མི་ཁ་ལྷ་ཡི་ཕམ་ཕབ་ཡིན། །ཞེས་ལྷའི་དངོས་གྲུབ་ལྟ་བུ་ཡིན་པར་གསུངས། དེས་ན་མི་ཁ་སྡང་བ་སོགས་རྐྱེན་ངན་རུ་འཛིངས་པའི་སྐབས་འདིར་དེ་ལྟར་བསམ། རང་བདེ་ཞིང་སྐྱིད་པ་བྱུང་ན། དགེ་བའི་འབྲས་བུ་བྱུང་སྙམ་དུ་ལྷག་པར་བྱང་ཆུབ་ཀྱི་སེམས་བསྒོམ་པ་ལ་སྤྲོ་ཤུགས་བསྐྱེད་པ་སོགས་བྱ་གསུངས།
No comments:
Post a Comment