གསུམ་པ་རྩོད་པ་སྤོང་བ།
ཁ་ཅིག རང་རྒྱལ་གྱི་རྒྱུད་ཀྱི་འགོག་བདེན་ཡིན་ན། རང་རྒྱལ་གྱི་འགོག་བདེན་ཡིན་དགོས་པར་ཐལ། ཉན་ཐོས་ལ་དེའི་ཕྱིར། ཟེར་ན།
མ་ཁྱབ་སྟེ། ཉན་ཐོས་འཕགས་པའི་རྟོགས་པ་སྔོན་དུ་སོང་བའི་རང་རྒྱལ་ཚོགས་ལམ་པའི་རྒྱུད་ཀྱི་འགོག་བདེན་རང་རྒྱལ་གྱི་འགོག་བདེན་མ་ཡིན་པའི་ཕྱིར། དེར་ཐལ། རང་རྒྱལ་གྱི་འགོག་བདེན་ཐོབ་པ་ལ་རང་རྒྱལ་གྱི་ལམ་བདེན་ཐོབ་པ་སྔོན་དོ་འགྲོ་དགོས་པ་གང་ཞིག །དེས་རང་རྒྱལ་གྱི་ལམ་བདེན་མ་ཐོབ་པའི་ཕྱིར། ཕྱི་མ་དེར་ཐལ། དེས་དེའི་འཕགས་ལམ་མ་ཐོབ་པའི་ཕྱིར་རོ།
ཡང་ཁ་ཅིག ལས་ཉོན་གྱི་ཀུན་འབྱུང་གཉིས་མི་འགལ་བར་ཐལ། ལས་ཉོན་གཉིས་མི་འགལ་བའི་ཕྱིར། དེར་ཐལ། དེའི་གཞི་མཐུན་ཡོད་པའི་ཕྱིར། དེར་ཐལ། ལས་འབྲས་ལ་སྐུར་བ་འདེབས་པའི་ལོག་ལྟ་དེ་དེ་ཡིན་པའི་ཕྱིར། དེར་ཐལ། དེ་མི་དགེ་བའི་ལས་ཡིན་པའི་ཕྱིར། ་དེར་ཐལ། དེ་ཡིད་ཀྱི་མི་དགེ་བའི་ལས་ཡིན་པའི་ཕྱིར། དེར་ཐལ། མི་དགེ་བ་བཅུའི་ལས་ཡོད་པའི་ཕྱིར་ཏེ། དེའི་ལས་ལམ་ཡོད་པའི་ཕྱིར། ཟེར་ན།
མ་ཁྱབ་སྟེ། དེ་གཉིས་དོན་མི་གཅིག་པའི་ཕྱིར། དེར་ཐལ། ཡིད་ཀྱི་གསུམ་དེའི་ལས་ལམ་ཡིན་ལ། ལམ་མ་ཡིན་ཞིང་། ལུས་ངག་གི་བདེན་པོ་དེའི་ལས་དང་ལས་ལམ་གཉིས་ཀ་ཡིན་པའི་ཁྱད་པར་འཐད་པའི་ཕྱིར། དེར་ཐལ། མཛོད་ལས།
གསུམ་ལམ་བདུན་ནི་ལས་ཀྱང་ཡིན།ཞེས་གསུངས་པའི་ཕྱིར།
No comments:
Post a Comment