________________________________________________
སྐྱེས་བུ་ཆེན་པོའི་ལམ་ལ་སྤྲོ་བ་བསྐྱེད་པའི་ཕྱིར་དུ་ཕན་ཡོན་བཤད་པ་ན་འདི་ལ་བཅུ།
- ཐེག་ཆེན་གྱི་འཇུག་སྒོ་སེམས་བསྐྱེད་ཁོ་ནར་བསྟན་པ།
- རྒྱལ་བའི་སྲས་ཞེས་བྱ་བ་མིང་ཐོབ་པ།
- ཉན་རང་རིགས་ཀྱི་སྒོ་ནས་ཟིལ་གྱིས་ནོན་པ།
- མཆོད་པའི་ཞིང་མཆོག་ཏུ་འགྱུར་བ།
- ཚོགས་རྒྱ་ཆེན་པོ་བདེ་བླག་ཏུ་རྫོགས་པ།
- སྡིག་སྒྲིབ་མྱུར་དུ་སྦྱང་བ།
- ཅི་བསམ་པ་འགྲུབ་པ།
- གནོད་པ་དང་བར་ཆད་ཀྱིས་མི་ཚུགས་པ།
- ས་ལམ་ཐམས་ཅད་མྱུར་དུ་རྫོགས་པ།
- འགྲོ་བའི་སྐྱིད་མ་ལུས་པ་འབྱུང་བའི་ཞིང་སར་འགྱུར་བ།
________________________________________________
དགུ་པ་ནི། བྱང་ཆུབ་ཀྱི་སེམས་མེད་པར་སྟོང་ཉིད་ཀྱི་ལྟ་བ་རྐྱང་པས་ཡེ་ཤེས་ལས་བསོད་ནམས་ཀྱི་ཚོགས་རྫོགས་མི་ནུས་ལ། ཚོགས་གཉིས་རྫོགས་ཤིང་སྒྲིབ་གཉིས་བག་ཆགས་དང་བཅས་པ་སྤང་བ་ནི། གཙོ་བོར་ཀུན་རྫོབ་བྱང་ཆུབ་ཀྱི་སེམས་ཀྱི་མཐུ་ལས་བྱུང་བ་ཡིན། སེམས་འདི་ཡོད་ན་གསང་སྔགས་ཀྱིས་ཚེ་གཅིག་ལ་འཚང་རྒྱ་བར་ནུས་ཀྱང་། འདི་མེད་ན་སྔགས་ཀྱིས་ཐེག་ཆེན་གྱི་ཚོགས་ལམ་ཆུང་ངུའང་འཐོབ་མི་ནུས། མདོར་ན་དགེ་ཆོས་ཐམས་ཅད་སྐྱེད་པའི་རྩ་བ་བྱང་ཆུབ་ཀྱི་སེམས་འདི་ཡོད་པས་ནི་བྱ་རོག་ལ་ཟས་ཁམ་གཅིག་བྱིན་པ་ཚུན་གྱི་དགེ་བ་ཀུན་སངས་རྒྱས་ཀྱི་གོ་འཕང་གི་རྒྱུ་ཁོ་ནར་བསྒྱུར་ནུས་པས། ས་ལམ་མྱུར་དུ་རྫོགས་པ་འོང་གསུངས།
བཅུ་པ་ནི། འཇུག་པ་ལས། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང་། །ཞེས་སོགས་ལྟར། འཇིག་རྟེན་འདིའི་བདེ་སྐྱིད། ཉན་རང་། འཁོར་བསྒྱུར་སོགས་ཐམས་ཅད་སངས་རྒྱས་ཀྱི་མཐུས་བྱུང་བ་ཡིན་ལ། སངས་རྒྱས་ནི་བྱང་ཆུབ་སེམས་དཔའ་ལས་འཁྲུངས། བྱང་ཆུབ་སེམས་དཔའ་ནི་བྱང་ཆུབ་ཀྱི་སེམས་ལས་འབྱུང་བས་ན། འགྲོ་བའི་བདེ་སྐྱིད་ཐམས་ཅད་ཀྱི་རྩ་བ་བྱང་ཆུབ་ཀྱི་སེམས་ཁོ་ན་ཡིན་ཞིང་། དེར་མ་ཟད་ཆོས་ཀྱི་ཕུང་པོ་ཐམས་ཅད་ཀྱི་སྙིང་པོ། རྒྱལ་སྲས་དམ་པ་རྣམས་ཀྱི་ཐུགས་དམ་གྱི་མཐིལ། གང་གི་མཐུས་གསང་སྔགས་ལ་ཁྱད་ཐོན་པར་བྱེད་པའང་སེམས་འདི་ཡིན། དགེ་བཤེས་སྟོན་པས་མི་ཞིག་ལ་སྐུ་མཆེད་གསུམ་གྱི་ལོ་རྒྱུས་དྲིས་པར། སོ་སོའ་ིཚུལ་ཞུས་པས།ངོ་མཚར་ཆེ།དེ་ཡང་གཅིག་ཡིན་གསུངས།ཁམས་པ་ལུང་པའི་གནས་ཚུལ། ཁོང་གྲོག་པོའ་ིཁར་བཞུགས་ནས་རེས་སྤྱན་ཟིམ་མེ་བ་དང་། རེས་བཤུམ་པ་འབའ་ཞིག་མཛད་ནས་བཞུགས་འདུག་ཞུས་པས་ཕྱག་ཐལ་མོ་སྦྱར། ཆོས་བྱ་བ་ཁོང་གིས་བྱས་འདུག་གསུངས་ཏེ། བསྔགས་པ་མཛད་ཚུལ།དེས་ན་སྤྱོད་འཇུག་ལས།དམ་ཆོས་འོ་མ་བསྲུབས་པ་ལས།།མར་གྱི་ཉིང་ཁུ་བྱུང་བ་ཡིན། །ཞེས་པ་ལྟར་ཆོས་ཀུན་གྱི་སྙིང་པོའ་ིཡང་སྙིང་ལྟ་བུ་ནི་བྱང་ཆུབ་ཀྱི་སེམས་འདི་ཡིན་པས། ཐམས་ཅད་ཀྱིས་གང་ཐུབ་ཅི་ཐུབ་ཀྱིས་འདི་བསྐྱེད་ཐབས་ལ་གཞོལ་བར་ཞུ་ཞིང་། ཐེག་ཆེན་གྱི་བསྟན་པ་ཡོད་མེད་ཀྱང་བྱང་ཆུབ་ཀྱི་སེམས་ཡོད་མེད་ཀྱི་རྗེས་སུ་འགྲོ་ལྡོག་བྱེད་པས། ཐམས་ཅད་ཀྱི་ཆོས་ཟབ་ཟབ་མོ་ཡིན་ཟེར་བ་གཞན་རྣམས་རེ་ཞིག་བཞག་ནས།འདི་ལ་ནན་ཏན་མཛད་དགོས། འདི་ལྟ་བུའི་གནད་མ་ཤེས་པར་ས་དགེ་བཀའ་རྙིང་གི་ཆོས་པ་མང་པོས་འཚང་རྒྱ་བར་འདོད་ཀྱང་བྱང་ཆུབ་ཀྱི་སེམས་མི་དགོས་པར་གསང་སྔགས་ཀྱི་རིམ་གཉིས་བསྒོམ་སྟེ་ལམ་མྱུར་མོར་བགྲོད་དུ་རེ་བ་ནི། འཇིག་རྟེན་ཁྱིམ་པའི་ཁ་སྐད་དུ། སྐེ་འདོད་ལ་ལྦ་བ་མི་འདོད་ཟེར་བ་དང་འདྲ། དུས་གསུམ་གྱི་སངས་རྒྱས་ཐམས་ཅད་ཀྱིས་བྱང་ཆུབ་ཀྱི་སེམས་མ་བསྐྱེད་པར་སངས་རྒྱས་པ་མེད་པས།བྱང་ཆུབ་ཀྱི་སེམས་མི་དགོས་པའི་སངས་རྒྱས་ཤིག་ཡོད་ན་སྔར་མ་གྲགས་པ་ཞིག་འོང་ཉེན་ཡོད། དེའི་ཕྱིར་སངས་རྒྱས་ཀྱི་གོ་འཕང་ཞིག་འདོད་ཕྱིན་ཆད་བྱང་སེམས་འདི་མེད་ན་མི་འབྱུང་ཞིང་། འདི་དང་བྲལ་ན་སངས་རྒྱས་ཀྱི་གོ་འཕང་འཐོབ་པའི་རེ་བ་བྲལ་བ་ཡིན་པས་འདི་ལ་ནན་ཏན་བྱེད་དགོས། རེ་སྒོ་ཨ་ཙ་རས་རྗེ་སྒྲུབ་ཁང་པ་ལ། ཁྱེད་འོངས་པ་ན་བྱང་ཆུབ་ཀྱི་སེམས་ཀྱི་གཏམ་སྟོད་ཁོག་ཡངས་སེང་ངེ་བ་རེ་བྱེད་དུ་ཡོད། གཞན་དེང་སང་གི་མི་ལ་གཏམ་དེ་ཤོད་ས་མེད་གསུང་། དེ་བཞིན་དུ་རང་རེ་ཁ་ཅིག་གིས་བྱང་ཆུབ་ཀྱི་སེམས་དེ་དཀའ་བས་མི་སྐྱེ་ཟེར་ནས་ཡར་ཕུད། ཁ་ཅིག་དེ་ཐེག་ཆེན་ཐུན་མོང་བའི་ཡིན། དེ་བས་ཟབ་པ་རིམ་གཉིས་སོགས་བསྒོམ་ཟེར་ཏེ་མར་ཕུད་ནས་དོན་དུ་ཉམས་ལེན་བྱེད་མཁན་ཉུང་། དེ་ནི་དཔེར་ན་ཡིད་བཞིན་གྱི་ནོར་བུ་རྒྱ་མཚོར་མི་བཙལ་བར་བ་གླང་གི་རྨིག་རྗེས་ཀྱི་ཆུ་ལས་ཚོལ་བ་དང་འདྲ། རྗེ་བླ་མས་ཀྱང་། དེ་ལྟར་ཤེས་ནས་རྒྱལ་སྲས་དཔའ་བོ་རྣམས།།རིན་ཆེན་སེམས་མཆོག་ཐུགས་དམ་མཐིལ་དུ་འཛིན། །ཅེས་ཐུགས་དམ་གྱི་མཐིལ་དུ་བསྔགས་པ་བྱང་སེམས་འདི་ཁོ་ན་ཡིན། དེང་སང་ཁ་ཅིག་ཐུགས་དམ་གྱི་མཐིལ་ལྷ་རེ་ལ་བྱེད་ཟེར། ཁ་ཅིག་རྒྱ་ནག་སྐག་ཟློག་དང་། ཁ་མཆུ་ནག་པོ་ཞི་བྱེད་ཀྱི་གཟུངས་སོགས་ལ་བྱེད་ཟེར་ཏེ། བྱང་ཆུབ་ཀྱི་སེམས་བསྒོམ་པའི་སྐལ་བ་མེད་ན་སངས་རྒྱས་འཐོབ་དུས་མི་འོང་། ཇོ་བོས་གསེར་གླིང་པ་བླ་མ་རྣམས་ཀྱི་མཆོག་ཏུ་འཛིན་པ་དང་། ཕྱག་བསྙུང་སྐབས་འབྲོམ་ལ་ཁྱོད་སེམས་བཟང་བས་འདི་ལ་བྱིན་རླབས་གྱིས་གསུངས་པ་བྱང་ཆུབ་ཀྱི་སེམས་ལ་བསྔགས་བརྗོད་མཛད་པ་ཡིན། བླ་མ་དྷརྨ་རཀྵི་ཏ་དང་པོར་བྱེ་སྨྲའི་ལྟ་བ་འཛིན་ཀྱང་། བྱང་སེམས་ཀྱི་སྟོབས་ཀྱིས་མཐར་དབུ་མ་པར་གྱུར་ཚུལ། ཇོ་བོ་རྒྱ་བོད་གཉིས་ཀར་འཕྲིན་ལས་དར་རྒྱས་ཆེ་བ་ཡང་བཤེས་གཉེན་བསྟེན་ཚུལ་དང་། བྱང་ཆུབ་ཀྱི་སེམས་ཀྱི་མཐུ་ལས་བྱུང་།བཀའ་གདམས་གོང་མའི་ཞལ་ནས།སེམས་འདི་མེད་ན་རྣ་རྩར་རྔ་བོ་ཆེ་བརྡུངས་ཀྱང་མི་གོ་བའི་ཏིང་ངེ་འཛིན་ཡོད་ཀྱང་གར་ཡང་མི་ཕྱིན་ཞེས་དང་། བླ་མ་རཱ་ཧུ་ལ་གུཔྟས་ཀྱང་། ཡི་དམ་གྱི་ལྷའི་ཞལ་མཐོང་བ་དང་། མངོན་ཤེས་དང་རྫུ་འཕྲུལ་ཐོབ་པ་དང་། ཏིང་ངེ་འཛིན་རི་རྒྱུད་ཙམ་ཡོད་པས་གར་ཡང་མི་ཕྱིན། བྱམས་སྙིང་རྗེ་སྒོམས་གསུངས། གཞན་ཡང་མདོ་ལས་བྱང་ཆུབ་ཀྱི་སེམས་ནི་འཁོར་བསྒྱུར་གྱི་འཁོར་ལོ་རིན་པོ་ཆེ་དང་། སྐྱེས་བུའི་སྲོག་གི་དབང་པོ་དང་། ལག་པ་དང་ཡང་འདྲ་བར་གསུངས་པ་དང་།རྒྱུད་བླ་མ་ལས།ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་བསྐྱེད་མ་དང་། ཞེས་གསུངས་པ་ལྟར། དཔེར་ན། ཕ་ནི་རིགས་ཀྱི་ཐུན་མོང་མ་ཡིན་པའི་རྒྱུ་དང་། མ་ནི་ཐུན་མོང་བའི་རྒྱུ་ཡིན་པ་ལྟར། བྱང་ཆུབ་ཀྱི་སེམས་རིན་པོ་ཆེ་ནི་སངས་རྒྱས་ཀྱི་རྒྱུ་ཐུན་མོང་མ་ཡིན་པ་དང་། སྟོང་ཉིད་རྟོགས་པའི་ཤེས་རབ་ནི་བྱང་ཆུབ་གསུམ་གའི་ཐུན་མོང་བའི་རྒྱུ་ཡིན་པས་ཤེས་རབ་སྟོང་ཉིད་ནི་ཐེག་པ་ཆེ་ཆུང་གང་དང་ཕྲད་ཀྱང་དེའི་བྱང་ཆུབ་ཀྱི་རྒྱུར་འགྲོ། དེས་ན་བྱང་ཆུབ་ཀྱི་སེམས་མེད་པའི་ཕྱག་རྫོགས་དང་། རིམ་གཉིས་བསྒོམ་པ། ལྷ་ཚོགས་མང་པོའ་ིཞལ་མཐོང་བ་སོགས་ལས་ཀྱང་བྱང་ཆུབ་ཀྱི་སེམས་ལ་གོ་བ་ཙམ་ཆགས་པ་མ་འོངས་པ་ན་འཚང་རྒྱ་བ་ལ་མྱུར་བས་དེ་གལ་ཆེ་བ་ཡིན། བསྟན་པ་འདིའི་དམ་ཆོས་ཐམས་ཅད་མཁྱེན་ཅིང་གྲུབ་པའི་ཇོ་བོ་ཆེན་པོའ་ིགསུང་གི་མཐིལ་ལ། བྱམས་སྙིང་རྗེ་བྱང་ཆུབ་ཀྱི་སེམས་སྒོམས་གསུངས་འདུག་ན།ལྷ་བསྒོམ་སྔགས་བཟླས་ཙམ་ལ་མི་རེ་བར་འདི་ལ་བརྩོན་པར་མཛད་དགོས། དེ་འདྲ་བའི་ཆོས་ཀྱི་སྙིང་པོ་འདི་རྒྱུད་ལ་སྐྱེ་བའི་དོན་དུ་དཀའ་བ་སྤྱད་དེ། འདི་ལ་བརྩོན་ནའང་བརྩོན་རིན་ཆོག་པ་ཡིན་ཞིང་བསྒོམ་ན་མི་སྐྱེ་བའང་མིན་ཏེ་འདུས་བྱས་སོ་ན་མི་གནས་པས་ངེས་པར་སྐྱེ་ལ། དེ་ཡང་ཇོ་བོ་ཆེན་པོ་མ་བྱོན་གོང་བོད་དུ་སེམས་བསྐྱེད་མཆོད་པའི་ཆོ་ག་འབོགས་ནས། ཆོ་གའི་འགོར། མ་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། ཞེས་བརྗོད་པ་ཙམ་གྱིས་བྱང་སེམས་ཀྱི་གོ་ཆོད་པ་བྱེད་མཁན་བྱུང་ཡང་། བྱང་སེམས་རྒྱུད་ལ་སྐྱེ་བར་བྱེད་པ་ལ་བློ་སྦྱངས་དགོས་པ་ལས། བློ་མ་སྦྱངས་པར་སོ་ཐར་གྱི་སྡོམ་པ་འབོགས་པ་ལྟར་བྱས་པས་སེམས་སྐྱེ་བ་ལྟ་ཅི། དེ་ཙམ་གྱིས་བྱང་ཆུབ་ཀྱི་སེམས་ངོ་ཤེས་པའང་དཀའ་སྟེ།སྔོན་ཇོ་བོ་ཆེན་པོས་བོད་པ་རྣམས་ལ།བྱམས་པ་དང་སྙིང་རྗེ་ངོས་འཛིན་མི་ཤེས་པའི་བྱང་ཆུབ་སེམས་དཔའ་བོད་ཀྱིས་ཤེས་པར་འདུག་ཅེས་མི་མཉེས་པའི་ཚུལ་གསུངས།འོ་ན་གང་དགོས་ཞུས་པས། རིམ་ཅན་དུ་སྦྱངས་པ་ཡིན་མོད་གསུངས།
No comments:
Post a Comment