________________________________________________
སྐྱེས་བུ་ཆེན་པོའི་ལམ་ལ་སྤྲོ་བ་བསྐྱེད་པའི་ཕྱིར་དུ་ཕན་ཡོན་བཤད་པ་ན་འདི་ལ་བཅུ།
- ཐེག་ཆེན་གྱི་འཇུག་སྒོ་སེམས་བསྐྱེད་ཁོ་ནར་བསྟན་པ།
- རྒྱལ་བའི་སྲས་ཞེས་བྱ་བ་མིང་ཐོབ་པ།
- ཉན་རང་རིགས་ཀྱི་སྒོ་ནས་ཟིལ་གྱིས་ནོན་པ།
- མཆོད་པའི་ཞིང་མཆོག་ཏུ་འགྱུར་བ།
- ཚོགས་རྒྱ་ཆེན་པོ་བདེ་བླག་ཏུ་རྫོགས་པ།
- སྡིག་སྒྲིབ་མྱུར་དུ་སྦྱང་བ།
- ཅི་བསམ་པ་འགྲུབ་པ།
- གནོད་པ་དང་བར་ཆད་ཀྱིས་མི་ཚུགས་པ།
- ས་ལམ་ཐམས་ཅད་མྱུར་དུ་རྫོགས་པ།
- འགྲོ་བའི་སྐྱིད་མ་ལུས་པ་འབྱུང་བའི་ཞིང་སར་འགྱུར་བ།
________________________________________________
དྲུག་པ་ནི། སྡིག་པ་དག་པ་ལའང་འདི་ལས་ལྷག་པ་མེད་དེ། སྤྱོད་འཇུག་ལས། སྡིག་པ་སྟོབས་ཆེན་ཤིན་ཏུ་མི་བཟད་པ། །དེ་ནི་རྫོགས་པའི་བྱང་ཆུབ་སེམས་མིན་པ། །དགེ་གཞན་གང་གིས་ཟིལ་གྱིས་གནོན་པར་འགྱུར། །ཞེས་པ་ལྟར། བཤགས་པ་གཞན་གྱིས་མི་འདག་པའི་སྡིག་སྒྲིབ་ཤིན་ཏུ་ཆེ་བའང་། འདི་སྐྱེས་པས་ཟད་པར་འགྱུར་ཏེ། འཕགས་པ་ཐོགས་མེད་ཀྱིས་ལོ་བཅུ་གཉིས་སུ་བསྒྲུབ་པའི་དགེ་བ་ལས་སྙིང་རྗེ་ལན་ཅིག་བསྐྱེད་པ་དེ་སྡིག་སྒྲིབ་སྦྱོང་བ་ལ་ཆེས་ལྷག་པ་བྱུང་ཚུལ། གཞན་ཡང་། སྡིག་པ་ཤིན་ཏུ་མི་བཟད་བྱས་ན་ཡང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བརྟེན་ནས་ཡུད་ཀྱིས་སྒྲོལ་འགྱུར་བ། །དེ་ལ་བག་ཅན་རྣམས་ཀྱིས་ཅིས་མི་བརྟེན། །ཞེས་གསུངས་པ་ལྟར། སེམས་དེ་ཡོད་ན་སྡིག་སྒྲིབ་དང་དེའི་འབྲས་བུ་འཇིགས་པའི་འཕྲང་གང་དུ་འགྲིམ་པ་ནའང་། གྲོགས་དཔའ་བོ་ཆེན་པོ་དང་མཉམ་དུ་འགྲོགས་པ་ལྟར་འཇིགས་པ་མི་འབྱུང་ཞིང་། དེས་ནི་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་གཅིག་གིས་ངེས་པར་སྲེག་པར་བྱེད། །ཅེས་པ་ལྟར་སྡིག་པའི་ཕུང་པོ་ཇི་ལྟར་ཆེ་ཡང་བསྐལ་པའི་མེས་བུད་ཤིང་སྲེག་པ་བཞིན་དུ་འདག་པར་བྱེད་དེ། དེའི་ཕྱིར། སྡིག་པ་འཇོམས་པར་བྱེད་པ་ལའང་། སེམས་འདི་དང་མ་འབྲེལ་བ་སྡིག་སྦྱོང་གཞན་ལ་ལོ་བརྒྱར་བརྩོན་པ་ལས། འདི་ཉིད་ཐུན་གཅིག་བསྒོམ་པ་མཆོག་ཡིན།
བདུན་པ་ནི། སེམས་འདི་སྐྱེས་པ་ན་གནས་སྐབས་དང་མཐར་ཐུག་གི་དོན་ཐམས་ཅད་འབད་མེད་དུ་འགྲུབ་སྟེ། དོན་མཆོག་ཏུ་གྱུར་པ་སེམས་ཅན་ཐམས་ཅད་ཀྱི་མི་འདོད་པ་སྡུག་བསྔལ་སྤོང་བ་དང་། འདོད་པའི་བདེ་བ་འགྲུབ་པར་བྱེད་པའི་ཕྱིར། སྤྱོད་འཇུག་ལས། འདིས་ནི་ཚད་མེད་སྐྱེ་བོའ་ི ཚོགས་རྣམས་ཀྱི། །བདེ་མཆོག་བདེ་བླག་ཉིད་དུ་ཐོབ་པར་གསུངས། །ཞེས་སོགས་གསུངས། གཞན་ཡང་སེམས་འདི་རྒྱུད་ལ་སྐྱེས་ན་རྒྱུད་སྡེ་སོགས་ནས་བཤད་པའི་རིག་སྔགས་དང་ལས་ཚོགས་མི་ཕལ་དང་ཕལ་གྱིས་མི་འགྲུབ་པ་ཐམས་ཅད་ཀྱང་ཚེགས་མེད་པར་འགྲུབ་མོད། ངེད་ཚོས་མདོ་དང་རྒྱུད་སྡེ་བེའུ་བུམ་སོགས་ལས་བཤད་པའི་ཆར་འབེབས་སེར་སྲུང་སོགས་ལས་ཕྲན་ཚེགས་རྣམས་ཀྱང་བཤད་པ་བཞིན་མི་འགྲུབ་པ་འདི་དག་བྱང་ཆུབ་ཀྱི་སེམས་མེད་པས་ལན། དེས་ན་རང་གཞན་གྱི་ན་ཚ་སོགས་བར་ཆད་སེལ་ཞིང་ནུས་པ་ཆེ་བར་འདོད་ན། སེམས་འདི་བསྐྱེད་དགོས་ཀྱི། ལས་མི་འགྲུབ་པ་དེ་དག་ལས་ཚོགས་སྟོན་པའི་མན་ངག་གིས་ལན་སྙམ་པ་ལྟ་བུ་བྱ་མི་རུང་། དེར་མ་ཟད་ཧཱུཾ་ཧཱུཾ་ཕཊ་ཕཊ་སོགས་སྔགས་དང་རྫས་སོགས་ལ་ལྟོས་མི་དགོས་ཀྱི། བདེན་ཚིག་ཙམ་གྱིས་འགྲུབ་སྟེ། བྱང་སེམས་རྟག་ཏུ་ངུས་བདེན་ཚིག་གིས་སྐུ་ལུས་གསོས་པ་དང་། ལྷ་སར་གཙང་ཆུ་ཤོར་བ་སུས་ཀྱང་བཟློག་མ་ནུས་པའི་ཚེ་རྗེ་སྨོན་ལམ་དཔལ་བས་སྨོན་ལམ་དཔལ་བ་བྱང་ཆུབ་སེམས་དཔའ་ཡིན་ན། བདེན་པ་འདིས་ཆུ་ཁྱོད་ཕར་མྱུར་དུ་ལྡོག་ཅིག །ཅེས་པ་རྡོ་ལ་བྲིས་ནས་ཆུ་འགྲམ་དུ་བསྐྱལ་བས་དེ་མ་ཐག་ཆུ་བོ་ཕར་ལོག་པ་བྱུང་བའང་བདེན་ཚིག་ཙམ་གྱིས་བཟློག་པ་ཡིན། དེའི་ཕྱིར། དོན་གྱི་གཙོ་བོ་ཐམས་ཅད་མཁྱེན་པའི་གོ་འཕང་ནས་མ་མཐའ་ལས་ཚོགས་ཕྲ་མོ་ཞིག་ཡན་ཆད་འདིས་འགྲུབ།
No comments:
Post a Comment