________________________________________________
སྐྱེས་བུ་ཆེན་པོའི་ལམ་ལ་སྤྲོ་བ་བསྐྱེད་པའི་ཕྱིར་དུ་ཕན་ཡོན་བཤད་པ་ན་འདི་ལ་བཅུ།
- ཐེག་ཆེན་གྱི་འཇུག་སྒོ་སེམས་བསྐྱེད་ཁོ་ནར་བསྟན་པ།
- རྒྱལ་བའི་སྲས་ཞེས་བྱ་བ་མིང་ཐོབ་པ།
- ཉན་རང་རིགས་ཀྱི་སྒོ་ནས་ཟིལ་གྱིས་ནོན་པ།
- མཆོད་པའི་ཞིང་མཆོག་ཏུ་འགྱུར་བ།
- ཚོགས་རྒྱ་ཆེན་པོ་བདེ་བླག་ཏུ་རྫོགས་པ།
- སྡིག་སྒྲིབ་མྱུར་དུ་སྦྱང་བ།
- ཅི་བསམ་པ་འགྲུབ་པ།
- གནོད་པ་དང་བར་ཆད་ཀྱིས་མི་ཚུགས་པ།
- ས་ལམ་ཐམས་ཅད་མྱུར་དུ་རྫོགས་པ།
- འགྲོ་བའི་སྐྱིད་མ་ལུས་པ་འབྱུང་བའི་ཞིང་སར་འགྱུར་བ།
________________________________________________
བརྒྱད་པ་ནི། འཁོར་ལོས་བསྒྱུར་བའི་རྒྱལ་པོ་ལ་ལག་ན་རྡོ་རྗེ་དང་ཚངས་པ་བརྒྱ་བྱིན་རྒྱལ་ཆེན་བཞི་སོགས་ཀྱིས་གཉིད་ཉལ་བའི་གནས་སྐབས་ཚུན་ཆད་དུ་སྲུང་བ་ཡིན་ལ།བྱང་ཆུབ་སེམས་དཔའ་ལ་འཁོར་བསྒྱུར་གྱི་སྲུང་མ་ཉིས་འགྱུར་གྱིས་ཉིན་མཚན་ཀུན་ཏུ་སྲུང་བར་འགྱུར་བས། གནོད་པ་དང་། གདོན་དང་བགེགས་སོགས་ཅིའང་མི་འབྱུང་ལ། སེམས་འདི་མེད་ན་ད་ལྟ་བསྐང་གསོ་རྔ་རོལ་སོགས་ཀྱིས་དེ་རྣམས་གདན་དྲངས་ཀྱང་འབྱོན་མི་འབྱོན་ངེས་པ་མེད། སེམས་འདི་སྐྱེ་ན་རྒྱལ་པོ་རྣམ་ཐོས་སྲས་སོགས་རྒྱལ་ཆེན་སྡེ་བཞི་སྤྱན་མ་དྲངས་ཀྱང་བྲན་བཞིན་དུ་བསྲུང་སྐྱོབ་བྱེད། སྡོང་པོ་བཀོད་པའི་མདོ་ལས། རྣམ་པར་མི་གདུང་བའི་རྩི་ལུས་ལ་འཆང་ན། ནད་སོགས་ཀྱིས་གནོད་མི་ནུས་པ་དང་། རྩིའི་རྒྱལ་པོ་ཆུ་ཞེས་བྱ་བ་ལུས་ལ་བཅང་ན། སྦྲུལ་བྱེར་བ་དང་། རྩིའི་རྒྱལ་པོ་གཞན་གྱིས་མི་ཐུབ་པ་ལུས་ལ་འཆང་ན། དགྲས་མི་ཐུབ་པ་བཞིན་བྱང་ཆུབ་ཀྱི་སེམས་འདི་ཡོད་ན་ཉོན་མོངས་པའི་ནད་སོགས་ཀྱིས་མི་ཐུབ་པར་གསུངས་པ་དང་། དགེ་བཤེས་ཁམས་ལུང་པ་འཕན་པོ་ཡུང་བའི་ཕུར་བྱང་སེམས་བསྒོམ་བཞིན་བཞུགས་སྐབས་ཡུལ་དེའི་མི་མ་ཡིན་རྣམས་ཀྱིས་གནོད་སྐྱེལ་བར་བརྩམས་པ་ན། བཙན་ཞིག་གིས། ཁོང་གིས་ཁོ་རང་ལས་ངེད་ཚོ་ལ་གཅེས་པར་བྱས་ནས་རྟག་ཏུ་ངུ་བཞིན་འདུག་པས་གནོད་པ་སྐྱེལ་མི་ཕོད། ཅེས་སྨྲས་ཚུལ་དང་། གཞན་ཡང་སྟོན་པ་ཐུགས་རྗེ་ཅན་གྱིས་བདུད་དམག་བྱམས་པའི་མཐུས་ཕམ་པར་མཛད་པ། རྒྱལ་པོ་བྱམས་པའི་སྟོབས་བཞུགས་ཡུལ་གྱི་ཕྱུགས་རྫི་རྣམས་གནོད་སྦྱིན་ལྔས་མདངས་འཕྲོག་པར་མ་ནུས་པ། པེ་ཧར་གྱིས་བུ་སྟོན་དང་བླ་མ་དམ་པ་གཉིས་ལ་ལྕགས་སྨྱུག་ཕུལ་ཞིང་། དངུལ་ཆུ་རྒྱལ་སྲས་པ་ལ་ཕུལ་མ་ནུས་པའི་རབས་དང་། བུ་སྟོན་བསྙུན་སྐབས་རྒྱལ་སྲས་རིན་པོ་ཆེ་གདན་དྲངས་ནས་དེས་བྱང་ཆུབ་ཀྱི་སེམས་བསྒོམས་པས་ཕན་པའི་ལོ་རྒྱུས་སོགས་ལྟར་གནོད་པ་དང་བར་ཆད་ཀྱིས་མི་ཚུགས་པའི་ཕན་ཡོན་མཐའ་ཡས་པ་ཡོད། སེམས་འདི་བསྒོམས་པས་མི་མིན་གྱི་གནོད་པས་མི་ཚུགས་པ་མྱོང་གྲུབ་ཡིན་བྱས་པས་ཆོག་གསུངས།
No comments:
Post a Comment