________________________________________________
རྒྱུ་འབྲས་མན་ངག་བདུན་གྱི་སྒོ་ནས་བློ་སྦྱང་བ་ལ།
ཚད་མེད་བཏང་སྙོམས། མར་ཤེས། དྲིན་དྲན། དྲིན་གཟོ། ཡིད་འོང་གི་བྱམས་པ། སྙིང་རྗེ། ལྷག་བསམ། བྱང་ཆུབ་ཀྱི་སེམས་ཏེ་བརྒྱད་ལས། མར་ཤེས་ནས་ལྷག་བསམ་བར་དྲུག་ནི་རྒྱུ་དང༌། སེམས་བསྐྱེད་ནི་འབྲས་བུ་ཡིན།འདི་དག་རྒྱུ་འབྲས་སུ་འགྲོ་ལུགས་ཀྱང༌། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་འདོད་པའི་སེམས་བསྐྱེད་ཀྱི་སྔོན་དུ། གཞན་དོན་ཁུར་དུ་ཁྱེར་བའི་ལྷག་བསམ་འགྲོ་དགོས་ལ། དེ་ཡང༌། སེམས་ཅན་ཐམས་ཅད་སྡུག་བསྔལ་གྱིས་མནར་བ་ལ་མི་བཟོད་པའི་སྙིང་རྗེ་མེད་ན་མི་སྐྱེ། དེ་སྐྱེ་བ་ལ་སེམས་ཅན་ཐམས་ཅད་བུ་ཡིད་དུ་འོང་བ་ལྟར་གཅེས་ལ་ཕངས་པའི་རྣམ་པ་ཅན་དུ་འཆར་བའི་ཡིད་འོང་གི་བྱམས་པ་བསྐྱེད་དགོས། དེ་ལྟ་བུའི་བྱམས་པའང༌། ད་ལྟ་གཉེན་ལ་ཡིད་འོང་སྐྱེ་ཞིང༌། དགྲ་ལ་མི་སྐྱེ་བས། སེམས་ཅན་ཐམས་ཅད་གཉེན་དུ་བལྟ་བ་སྔོན་དུ་འགྲོ་དགོས་ཤིང༌། གཉེན་གྱི་མཐར་ཐུག་ཀྱང་ཨ་མ་ཉིད་ཡིན་པའི་ཕྱིར། སེམས་ཅན་ཐམས་ཅད་མར་བསྒྲུབས་ནས་དྲིན་དྲན་པ་དང༌། དྲིན་གཟོ་བ་བྱུང་ན་གཅེས་ལ་ཕངས་པའི་བྱམས་པའང་འབྱུང་ངོ༌།།དེས་ན་རྒྱུ་འབྲས་ཞེས་པའང་ཕྱི་མ་ཕྱི་མ་སྐྱེ་བ་ལ། སྔ་མ་སྔ་མ་སྔོན་དུ་འགྲོ་བ་ཞིག་དགོས། འདི་ལ་བློ་སྣ་ཐུང་ངུས་ལམ་ཐག་རིང་མོ་ཞིག་ཏུ་མི་སེམས་པར་རིམ་གྱིས་སྦྱངས་ན་ངེས་པར་སྐྱེ་ནུས་ཏེ། སྤྱིར་བཀའ་གདམས་ཀྱི་མན་ངག་ཟབ་ཅིང༌། ལྷག་པར་འཇམ་མགོན་ཙོང་ཁ་པ་ཆེན་པོའ་ིབསྟན་པ་འདི་ནི་རྗེ་བཙུན་འཇམ་པའི་དབྱངས་ཀྱི་ཞལ་ཆབ་དྲོན་མོ་ལྟར་མདོ་སྔགས་གང་ལའང་ཆ་ཚང་ཞིང་དྲི་མ་དང་བྲལ་ལ། སྔ་མ་དག་ལས་ཀྱང་ཆེས་ཆེར་ཟབ་ཏུ་སོང་བ་ཡིན་པས། བདག་གི་སྐྱབས་མགོན་བླ་མ་རིན་པོ་ཆེས། བོད་སྔ་རབས་ཀྱི་བསྟན་པ་རྣམས་རྗེ་བླ་མའི་བསྟན་པ་གསེར་སྦྱངས་བཙོ་མ་ལྟ་བུ་འདི་ལྟར་འབྱུང་རྒྱུའི་གྲ་སྒྲིགས་ཀྱི་ཚུལ་དུ་བྱུང་བ་ཡིན་གསུང༌། བློ་གཟུ་བོར་གནས་ན། སྟག་ཚང་ལོ་ཙཱ་བས། མདོ་སྔགས་མཐའ་དག་ཁྱད་པར་རྡོ་རྗེ་ཐེག །རྒྱུད་སྡེ་མཐའ་དག་ཁྱད་པར་བླ་མེད་དོན། །རིམ་གཉིས་མཐའ་དག་ཁྱད་པར་སྒྱུ་ལུས་ལ། །སྔོན་མེད་ལེགས་བཤད་གཏེར་ཆེན་ཁྱོད་ལ་བསྟོད། །ཅེས་དང༌། རྫོགས་ཆེན་དཔལ་དགེའི་གསུང་ལས། མདོ་སྔགས་ལེགས་བཤད་འབྱུང་གནས་ཙོང་ཁ་པ། །ཞེས་པ་ལྟ་བུ་དོན་ལ་གནས་པའི་བསྔགས་བརྗོད་ཡིན། གཞན་དུ་ན། སངས་རྒྱས་སྦར་བཅང་ཟེར་བའི་ཁ་བོ་ཆེའི་ཆོས་ཡོད་ཀྱང་དེས་ཚོགས་ལམ་ཆུང་ངུའང་སྦར་བཅངས་སུ་གཏོད་དཀའ། ལམ་རིམ་འདི་ལ་བརྟེན་ན་སངས་རྒྱས་སྦར་བཅངས་སུ་འབྱུང༌། དེ་ཡང་ལམ་གྱི་གོ་རིམ་ལྟར་མ་སྦྱངས་ན་མི་སྐྱེ་བས་དེའི་ཕྱིར་འདིར། དང་པོ་མར་ཤེས་ནས་སྦྱང་བ་ཡིན། འདི་ལ་ནན་ཏན་མི་བྱེད་པ་ནི། གང་དག་བདེ་བ་འདོད་པས་སྡིག་པ་སྒྲུབ་ན་གོ་ལོག་ཏུ་སོང་བ་ལྟར། འདོད་པ་སངས་རྒྱས་ཀྱི་གོ་འཕང་འདོད་ལ༑ སེམས་འདི་སྦྱོང་བ་ལ་མི་འབད་ན་ལག་ལེན་གོ་ལྡོག་པ་ཡིན་པས།གསང་སྔགས་ཀྱི་མྱུར་ལམ་ལ་བརྩོན་ཀྱང༌། གཙང་དུ་འགྲོ་དགོས་པའི་མི་ཞིག་རྟ་ལྟ་བུར་ཞོན་ནས་སོང་སོང་སྟེ་མཐར་གཙང་དུ་སླེབས་སོ་སྙམ་ཙ་ན་གཙང་དུ་མ་སླེབས་པར་ཀོང་པོ་རོང་དུ་སླེབས་པ་ལྟར་འགྱུར་བས་བྱང་ཆུབ་ཀྱི་སེམས་སྦྱོང་ཐབས་ལ་འབད་དགོས། མར་ཤེས་སྐྱེ་བ་ལའང་དཔེར་ན།རི་མོ་བྲི་བ་ལ་གཞི་ཞལ་བ་འཇམ་པོར་ཁོད་མ་སྙོམས་ན་མི་འོང་བ་བཞིན་དུ་སེམས་ཅན་ཐམས་ཅད་ལ་སེམས་མ་སྙོམས་ན། བྱམས་སྙིང་རྗེ་སོགས་གང་བསྒོམས་ཀྱང༌། ཕྱོགས་རིས་ཅན་ལས་མི་སྐྱེ་བས། དང་པོར་བཏང་སྙོམས་ཚད་མེད་བསྐྱེད་དགོས་སོ།།
