༄༅།། ཐེག་ཆེན་གསོ་སྦྱོང་ལེན་ཚུལ།
རབ་འབྱམས་རྒྱལ་བ་ཀུན་གྱི་དངོས། །བླ་མའི་ཞབས་ལ་གུས་བཏུད་ནས། །ཐེག་པ་ཆེན་པོའི་གསོ་སྦྱོང་གི །སྡོམ་པ་ལེན་པའི་ཆོ་ག་འགོད། །འདིར་གང་ཞིག་གཏིང་མཐའ་མེད་པའི་སྡུག་བསྔལ་དང༌། ཀུན་འབྱུང་གི་ཉེས་དམིགས་རིག་ཅིང་རང་ཉམས་ལ་དཔག་ནས་མཁའ་ཁྱབ་ཀྱི་མ་རྒན་ཉམ་ཐག་པའི་ངང་ཚུལ་དྲན་ཏེ་སྙིང་ནས་བྱང་ཆུབ་དོན་དུ་གཉེར་བའི་སྐལ་བཟང་གི་སྐྱེ་བོ་དག་གིས་ཐེག་པ་ཆེན་པོའི་གསོ་སྦྱོང་ཇི་ལྟར་བྱ་བའི་ཚུལ་ནི། ཐོ་རེངས་ལག་རིས་མཐོང་ཙམ་གྱི་དུས་དེར་ཁྲུས་ལེགས་པར་བྱས། གཙང་ཞིང་ཡིད་དུ་འོང་བའི་ས་ཕྱོགས་སུ་དཀོན་མཆོག་གི་རྟེན་དགྲམ། བཟང་ལ་གྱ་ནོམ་པའི་མཆོད་པ་ཅི་འབྱོར་བཤམ། མདུན་དུ་གུས་པའི་སྤྱོད་ལམ་གྱིས་འཁོད་དེ། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བདག་དང་གཞན་དོན་བསྒྲུབ་སླད་དུ། །བདག་གིས་བྱང་ཆུབ་སེམས་བསྐྱེད་དོ། །ཕྱོགས་བཅུ་དག་ན་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་གསོན། །བདག་གིས་རྫོགས་པའི་བྱང་ཆུབ་ཕྱིར། །དེང་ནས་བྱང་ཆུབ་སེམས་བསྐྱེད་དོ། །ཞེས་ལན་གསུམ་གྱི་སྒོ་ནས་སྐྱབས་འགྲོ་སེམས་བསྐྱེད་ནན་ཏན་དུ་བྱས་ལ། ཐམས་ཅད་དུ་ནི་ས་གཞི་དག །གསེག་མ་ལ་སོགས་མེད་པ་དང༌། །ལག་མཐིལ་ལྟར་མཉམ་བཻཌཱུརྱའི། །རང་བཞིན་འཇམ་པོར་གནས་གྱུར་ཅིག །ལྷ་དང་མི་ཡི་མཆོད་པའི་རྫས། །དངོས་སུ་བཤམས་དང་ཡིད་ཀྱི་སྤྲུལ། །ཀུན་བཟང་མཆོད་སྤྲིན་བླ་ན་མེད། །ནམ་མཁའི་ཁམས་ཀུན་ཁྱབ་གྱུར་ཅིག །ཨོཾ་ན་མོ་བྷ་ག་ཝ་ཏེ། བཛྲ་ས་ར་པྲ་མརྡ་ནེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ། མཧཱ་བཛྲེ། མཧཱ་ཏེ་ཛ་བཛྲེ། མ་ཧཱ་བིདྱཱ་བཛྲེ། མཧཱ་བོདྡྷི་ཙིཏྟ་བཛྲེ། མཧཱ་བོདྡྷི་མཎྜོ་པ་སཾ་ཀྲ་མ་ཎ་བཛྲེ། སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་བཛྲེ་སྭཱཧཱ། ལན་གསུམ། དཀོན་མཆོག་གསུམ་གྱི་བདེན་པ་དང༌། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང༌། །ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང༌། །ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་བཞིན་ཉིད་དུ་གྱུར་ཅིག །ཅེས་ས་གཞི་དང་མཆོད་རྫས་བྱིན་གྱིས་བརླབ། མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་ཟད་འཇོམས་མཛད་ལྷ། །དངོས་རྣམས་མ་ལུས་ཡང་དག་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཅེས་རང་གི་དྲིན་ཅན་རྩ་བའི་བླ་མ་སྟོན་པ་ཐུབ་པའི་དབང་པོར་གསལ་བ་ལ་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱིས་བསྐོར་བ་སྤྱན་དྲངས་མདུན་གྱི་ནམ་མཁར་མངོན་སུམ་ལྟ་བུར་བཞུགས་པར་མོས་ལ། །སྤྲོ་ན། ཇི་སྙེད་སུ་དག ཅེས་པ་ནས། ཕྱིར་བསྔོའོ། །ཞེས་པའི་བར་དང༌། བསྡུ་ན། སྒོ་གསུམ་གུས་པའི་སྒོ་ནས་ཕྱག་འཚལ་ལོ། །དངོས་བཤམས་ཡིད་སྤྲུལ་མཆོད་པ་མ་ལུས་འབུལ། །ཐོག་མེད་ནས་བསགས་སྡིག་ལྟུང་ཐམས་ཅད་བཤགས། །སྐྱེ་འཕགས་དགེ་བ་རྣམས་ལ་རྗེས་ཡི་རང༌། །འཁོར་བ་མ་སྟོང་བར་དུ་ལེགས་བཞུགས་ནས། །འགྲོ་ལ་ཆོས་ཀྱི་འཁོར་ལོ་བསྐོར་བ་དང༌། །བདག་གཞན་དགེ་རྣམས་བྱང་ཆུབ་ཆེན་པོར་བསྔོ། །ཞེས་སོགས་ཡན་ལག་བདུན་པ་རྒྱས་བསྡུས་གང་རིགས་སོང་རྗེས། ཕྱག་གསུམ་བཙལ་ནས་སྡོམ་པ་ཞུ་བའི་ཡོན་དུ་མཎྜལ་རྒྱས་བསྡུས་གང་རུང་ཞིག་ཕུལ། བླ་གོས་ཕྲག་པ་གཅིག་ཏུ་གཟར། པུས་མོ་གཡས་པའི་ལྷ་ང་ས་ལ་བཙུགས། ལག་པ་གཉིས་ཐལ་མོ་སྦྱར་ཏེ།་བསམ་པ་འདི་མཉམ་དུ། ག་རེ། བདག་སོགས་ནམ་མཁའི་མཐའ་དང་མཉམ་པའི་སེམས་ཅན་རྣམས་ཐོག་མ་མེད་པ་ནས་ད་ལྟའི་བར་དུ་སྤྱིར་འཁོར་བ་དང་ཁྱད་པར་ངན་སོང་གསུམ་གྱི་སྡུག་བསྔལ་ཡོད་རྒུ་ཞིག་གྲངས་མེད་པར་མྱོང་དུ་ཟིན་ཀྱང་། སྡུག་བསྔལ་ལ་བདེ་བ་དང་། བདག་མེད་ལ་བདག་ཏུ་འཛིན་པའི་བློ་ངན་ལྔ་ཤོར་འདིའི་མཐུས་ལས་དང་ཉོན་མོངས་པའི་གཞན་དབང་དུ་སོང་ནས། སླར་ཡང་འཁོར་བ་དང་ངན་སོང་གི་སྡུག་བསྔལ་བཟོད་དཀའ་བ་སྔར་ལས་ཀྱང་ཆེས་ཆེར་མང་བ་ཞིག་རང་དབང་མེད་པར་མྱོང་དགོས་པའི་ངང་ཚུལ་འདི་བསམ་ན་ངེས་པར་སྙིང་རླུང་ལྡང་འོས་པའི་ཚོད་ཙམ་དུ་འདུག འོན་ཀྱང་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་སྔོན་བྱོན་ཟིན་པའི་སངས་རྒྱས་བཅོམ་ལྡན་འདས་དེ་དག་ཀྱང་། གདོད་མ་ནས་སངས་རྒྱས་ཟིན་པ་ཞིག་མིན་གྱི། སྔོན་བདག་ཅག་དང་མཚུངས་པར་འཁོར་བར་གནས་པ་ལས་དགེ་བའི་བཤེས་གཉེན་རེ་དང་མཇལ་བའི་དྲིན་ལས་འཁོར་བས་ཡིད་འབྱུང་ཞིང་། སེམས་ཅན་ཀུན་ལའང་བརྩེ་བ་སྐྱེས་ནས་བྱང་ཆུབ་ཏུ་ཐུགས་བསྐྱེད་དེ། འདི་ལྟ་བུའི་ཐེག་པ་ཆེན་པོའི་གསོ་སྦྱོང་གི་སྡོམ་པ་འཞེས་ནས་ཡང་དག་པར་བསྲུངས་ཞིང་། ལམ་ལ་བསླབ་ནས་སངས་རྒྱས་པ་ཡིན། དེ་བཞིན་དུ་བདག་གིས་ཀྱང་དགེ་བའི་བཤེས་གཉེན་གྱི་སྐུ་དྲིན་ལས་ཐེག་པ་ཆེན་པོའི་ཆོས་དང་མཇལ་བའི་སྐབས་འདིར་བྱང་ཆུབ་ཏུ་སེམས་བསྐྱེད་ནས་ལམ་ལ་བསླབ་ངེས་པར་སངས་རྒྱས་ཀྱི་གོ་འཕང་ཐོབ་ནུས། དེ་ལྟ་ནའང་། གཞི་དང་ལམ་དང་འབྲས་བུའི་གནས་སྐབས་ཐམས་ཅད་སུ་མེད་དུ་མི་རུང་བའི་མཛའ་བཤེས་ཀྱི་གཙོ་བོ། འདི་ཕྱིའི་ལེགས་ཚོགས་ཐམས་ཅད་གང་ལས་འབྱུང་བའི་སྱིད་བཞིན་་ནོར་བུ། ཐོག་མ་མེད་པ་ནས་འཁོར་བའི་ཕྱི་མཐའ་མ་རྫོགས་ཀྱི་བར་དུ་དྲིན་གྱིས་བསྐྱངས་ཤིང་སྐྱོང་བར་འགྱུར་བའི་མཁའ་ཁྱབ་ཀྱི་མ་རྒན་ཉམ་ཐག་པ་འདི་དག་ཡལ་བར་དོར་ནས། རང་ཉིད་གཅིག་པུའི་བདེ་ཐབས་ཙམ་ལྷུར་ལེན་པ་ནི་རྨོངས་པ་མོ་བཟད་དུད་འགྲོ་རྣམས་དང་ཁྱད་པར་ཅུང་ཟད་ཀྱང་མི་འདུག དེས་ན་བདག་གིས་མ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་ཐོབ་པར་བྱ། དེའི་ཕྱིར་དུ་རྒྱལ་བ་སྲས་དང་བཅས་པ་འདི་རྣམས་ཀྱི་སྤྱན་སྔར་ཐེག་པ་ཆེན་པོའི་གསོ་སྦྱོང་གི་སྡོམ་པ་བླངས་ལ། སང་ཉི་མ་མ་ཤར་གྱི་བར་དུལེགས་པར་བསྲུང་བར་བྱའོ་སྙམ་པའི་བསམ་པ་མིག་ནས་མཆི་མ་འཁྲུགས་པ་དང་། ལུས་ཀྱི་བ་སྤུ་ལྡང་བའི་ཚོད་ཙམ་གྱི་དུང་དུང་བ་དང་བཅས། བླ་མ་ཐུབ་པའི་དབང་པོའི་རྗེས་སུ་ཟློས་པར་མོས་ལ།
༆ ཕྱོགས་བཅུ་ན་བཞུགས་པའི་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། །ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟ་ཅང་ཤེས་ལྟ་བུ། གླང་པོ་ཆེན་པོ་ལྟ་བུ། བྱ་བ་བྱས་ཤིང་བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་བཀའ། ལེགས་པར་རྣམ་པར་གྲོལ་བའི་ཐུགས། ལེགས་པར་རྣམ་པར་གྲོལ་བའི་ཤེས་རབ་ཅན་དེ་དག་གིས། སེམས་ཅན་ཐམས་ཅད་ཀྱི་དོན་གྱི་ཕྱིར་དང༌། ཕན་པར་བྱ་བའི་ཕྱིར་དང༌། གྲོལ་བར་བྱ་བའི་ཕྱིར་དང༌། མུ་གེ་མེད་པར་བྱ་བའི་ཕྱིར་དང༌། ནད་མེད་པར་བྱ་བའི་ཕྱིར་དང༌། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དང༌། བླ་ན་མེད་པར་ཡང་དག་པར་རྫོགས་པའི་བྱང་ཆུབ་ངེས་པར་རྟོགས་པར་བྱ་བའི་ཕྱིར་གསོ་སྦྱོང་ཡང་དག་པར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང༌། དུས་འདི་ནས་བཟུང་སྟེ། ཇི་སྲིད་སང་ཉི་མ་མ་ཤར་གྱི་བར་དུ། སེམས་ཅན་ཐམས་ཅད་ཀྱི་དོན་གྱི་ཕྱིར་དང༌། ཕན་པར་བྱ་བའི་ཕྱིར་དང༌། གྲོལ་བར་བྱ་བའི་ཕྱིར་དང༌། མུ་གེ་མེད་པར་བྱ་བའི་ཕྱིར་དང༌། ནད་མེད་པར་བྱ་བའི་ཕྱིར་དང༌། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ངེས་པར་རྟོགས་པར་བྱ་བའི་ཕྱིར་གསོ་སྦྱོང་ཡང་དག་པར་བླང་བར་བགྱིའོ། །ཞེས་ལན་གསུམ་བརྗོད། གསུམ་པ་རྫོགས་པ་དང་དུས་མཉམ་དུ་རང་གི་རྒྱུད་ལ་སྡོམ་པ་ཐོབ་བྱུང་སྙམ་པའི་དགའ་བ་བསྒོམ། དེ་ནས་སྔར་བཤད་པ་ལྟ་བུའི་བྱང་ཆུབ་ཀྱི་སེམས་ཀྱི་ཀུན་སློང་གསལ་བཏབ་སྟེ། ཇི་ལྟར་སྔོན་གྱི་དགྲ་བཅོམ་པ་རྣམས་ཀྱིས་སྲོག་གཅོད་ལ་སོགས་པའི་ལུས་ངག་གི་ཉེས་སྤྱོད་ཐམས་ཅད་སྤངས་ཤིང་ཡིད་ཀྱིས་དེ་དག་ལས་སླར་ལོག་པ་དེ་བཞིན་དུ་བདག་གིས་ཀྱང་སེམས་ཅན་ཐམས་ཅད་ཀྱི་དོན་དུ་ཉེས་སྤྱོད་དེ་རྣམས་ཉིན་ཞག་གཅིག་གི་བར་དུ་སྤངས་ནས་བསླབ་བྱ་རྣམས་ཚུལ་བཞིན་དུ་བསླབ་པར་བྱའོ་སྙམ་དུ་བསམས་ལ། དེང་ནས་སྲོག་གཅོད་མི་བྱ་ཞིང༌། །གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་སྤྱོད་ཅིང༌། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་པོ་ཉེར་བསྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་ཆེ་མཐོ་མི་བྱ་ཞིང༌། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་རྒྱན་དང་ནི། །གར་དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི། །སྲོག་གཅོད་ལ་སོགས་མི་བྱེད་ལྟར། །དེ་བཞིན་སྲོག་གཅོད་ལ་སོགས་སྤངས། །བླ་མེད་བྱང་ཆུབ་མྱུར་ཐོབ་ཤོག །སྡུག་བསྔལ་མང་འཁྲུགས་འཇིག་རྟེན་འདིར། །སྲིད་པའི་མཚོ་ལས་སྒྲོལ་བར་ཤོག །ཅེས་ལན་གཅིག་བརྗོད། ཨོཾ་ཨ་མོ་གྷ་ཤི་ལ་སཾ་བྷ་ར། བྷ་ར་བྷ་ར། མཧཱ་ཤུདྡྷ་སཏྭ། པདྨ་བི་བྷྱུ་ཥི་ཏེ། བྷུ་ཛ། དྷ་ར་དྷ་ར། ས་མནྟ། ཨ་ཝ་ལོ་ཀེ་ཏེ་ཧཱུཾ་ཕཊ་སྭཱཧཱ། ཞེས་ཚུལ་ཁྲིམས་རྣམ་དག་གི་གཟུངས་ལན་ཉེར་གཅིག་བཟླས་རྗེས། ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག ཅེས་སོགས་བསྔོ་བ་དང་སྨོན་ལམ་གྱིས་མཐའ་བརྒྱན་པར་བྱ། འདི་ནི་རང་ཉིད་གཅིག་པུས་རྟེན་གྱི་དྲུང་དུ་ལེན་ཚུལ་གཙོ་བོར་བྱས་པ་ཡིན་གྱི། བླ་མའི་དྲུང་ནས་ལེན་སྐབས་མཎྜལ་འབུལ་བ་དང་། བླ་མས་ཀྱང་ཐོག་མཐའ་བར་གསུམ་གྱི་དམིགས་རྣམ་ལེགས་པར་བརྡ་སྤྲོད་ཅིང་། དངོས་གཞི་སྡོམ་པ་ལེན་ཆོག་སྐབས། སློབ་དཔོན་དགོངས་སུ་གསོལ། ཇི་ལྟར་སྔོན་གྱི་སོགས་དང་། མཇུག་གི དེང་ནས་སྲོག་གཅོད་ཅེས་སོགས་རྗེས་ཟློས་བྱ་བ་དང་། དངོས་གཞིའི་མཇུག་ཐབས་ལེགས་བརྗོད་པ་སོགས་མཐོང་བ་བརྒྱད་པའི་ཕྱག་ལེན་ལྟར་བྱ་དགོས་སོ།། །།
No comments:
Post a Comment