༈ ཉིན་བཅུ་བདུན་པར། རྒྱལ་སྲས་ཆེན་པོ་ཞི་བ་ལྷའི་ཞལ་ནས། གང་ལ་སེམས་ཀྱི་དམ་པ་རིན་ཆེན་དེ། །སྐྱེས་པ་དེ་ཡི་སྐུ་ལ་ཕྱག་འཚལ་ཞིང༌། །གང་ལ་གནོད་པ་བྱས་ཀྱང་བདེ་འབྲེལ་བ། །བདེ་བའི་འབྱུང་གནས་དེ་ལ་སྐྱབས་སུ་མཆི། །ཞེས་གསུངས་པ་ལྟར། གང་ཞིག་རྒྱུད་ལ་སྐྱེས་པ་དེ་ལ། སྐུར་བ་འདེབས་པ་སོགས་ངན་པའི་འབྲེལ་བ་བཞག་པ་ཚུན་ཀྱང་གཏན་གྱི་བདེ་བར་འགོད་པར་མཛད་པའི་ཕན་ཡོན་ཅན་ཞེས་སོགས་ཀྱི་བྱང་ཆུབ་ཀྱི་སེམས་ཀྱི་ཕན་ཡོན་འགའ་ཞིག་གསུངས་ནས། མདོར་ན་སེམས་འདིས་ཟིན་པའི་བྱས་ཚད་ཆོས་དང༌། དེའང་སངས་རྒྱས་ཀྱི་རྒྱུ་ཐེག་ཆེན་གྱི་ཆོས་སུ་འགྲོ་བ་ཡིན་པའི་ཕྱིར། སྒྲུབ་པ་ཉམས་ལེན་བྱེད་པ་ལ། ལྷ་བསྒོམ་སྔགས་བཟླས་ཙམ་ལས་བྱེད་རྒྱུ་མེད་པ་བཞིན་མི་བྱེད་པར། སྒྲུབ་པ་ཉམས་སུ་བླང་བྱའི་གཞི་མ་བྱང་ཆུབ་ལམ་རིམ་དང༌། དེའི་ནང་ནས་ཀྱང་བྱང་ཆུབ་ཀྱི་སེམས་འདི་ལ་བྱེད་དགོས་ཀྱི། འདི་མེད་པར་མི་ཚེ་རི་སྟོང་དུ་བསྐྱལ་ཏེ་གཞན་ཇི་འདྲ་ཞིག་བསྒོམ་ཁུལ་བྱས་ཀྱང༌། སངས་རྒྱས་ཀྱི་གོ་འཕང་དང་ཅུང་ཟད་ཀྱང་ཉེ་རུ་མི་འགྲོ་བས། འདི་ཉིད་ཐུགས་དམ་གྱི་མཐིལ་དུ་གནང་དགོས་ཚུལ་དང༌། དེ་ལྟ་བུའི་སེམས་དེ་བསྐྱེད་པ་ལའང༌། སེམས་སྦྱོང་གི་མན་ངག་ལ་ལྟོས་དགོས་
ཚུལ་སོགས། ཀུན་སློང་འཆོས་ལུགས་མདོར་བསྡུས་ཤིག་སྩལ་ནས། སྔོན་དུ་ཇི་ལྟར་སོང་བའི་ས་བཅད་རྣམས་གསུངས་རྗེས། བྱང་ཆུབ་ཀྱི་སེམས་ཀྱི་ཕན་ཡོན་དང་བཏང་སྙོམས་བསྒོམ་པ་ལ་བསྐྱར་བཤད་མཛད།དེ་ནས་བྱང་ཆུབ་སེམས་སྦྱོང་གི་མན་ངག་བདུན་གྱི་དང་པོ་ནི་མར་ཤེས་ཡིན་ལ། འདི་རྒྱུད་ལ་སྐྱེ་ཤིན་ཏུ་དཀའ་ཞིང༌། མ་སྐྱེས་ན་དྲིན་དྲན་སོགས་རྒྱུ་འབྲས་ཕྱི་མ་རྣམས་མི་འབྱུང་བས་འདི་ལ་ནན་ཏན་འབད་དགོས། དེ་ལ་རྒྱུ་དང་པོ་མར་ཤེས་ནི། སེམས་ཅན་ཐམས་ཅད་གཉེན་གྱི་མཐར་ཐུག་མར་ཤེས་པ་སྟེ། འདི་རྒྱུད་ལ་མ་སྐྱེས་ན་བྱང་ཆུབ་སེམས་ཀྱི་སྐལ་བ་ཆད་པ་ཡིན། གཞན་ཟབ་མོ་སྟོང་པ་ཉིད་སོགས་ནི་རིགས་པའི་སྒོ་རྣམ་གྲངས་མང་པོ་ནས་བསམ་ཆོག་པས། དེ་ཙམ་དུ་རྟོགས་པར་མི་དཀའ་མོད། འདི་ལ་ལུང་ཞིག་གིས་བསམ་ནའང༌། བསམ་པའི་གཏིང་ནས་ངེས་ཤེས་རྙེད་པ་ཞིག་འབྱུང་དཀའ་ལ། དབང་རྣོན་ཆོས་ཀྱི་རྗེས་འབྲང་ལ་རིགས་པས་བསྒྲུབ་དགོས་ཤིང༌། འདིར་རྣམ་འགྲེལ་གྱི། སྐྱེ་བ་ཡོངས་སུ་ལེན་པ་ན། །འབྱུང་རྔུབ་དབང་པོ་བློ་དག་ནི། །རང་གི་རིགས་ལ་ལྟོས་མེད་ཅན། །ཞེས་སོགས་ཀྱི་རིགས་པ་གཅིག་ལས་མེད་པས་རྟོགས་དཀའ་ལ། འདི་ལ་དང་པོ་རིག་པའི་ཡ་མཐའ་ཐུག་མེད་དུ་བསྒྲུབ་དགོས་པས། དེ་རིང་གི་སེམས་འདི་ཁ་སང་གི་སེམས་ཀྱི་རྒྱུན་ཡིན་ཞིང་། དེའང་ཁ་ཉིན་གྱི་རིག་རྒྱུན་ཡིན་པ་ནས་བཟུང༌། མའི་མངལ་ནས་སྐྱེས་མ་ཐག་པའི་སེམས་དེ། སྐྱེ་ཁ་མའི་རྒྱུན་ཡིན་ཞིང༌། མངལ་དུ་ཞུགས་མ་ཐག་པའི་སེམས་དེ་ཞུགས་ཁ་མའི་རིག་པའི་རྒྱུན་ཡིན་པའི་ཕྱིར། འཁོར་བ་ལ་ཐོག་མའི་མཐའ་མེད་པས་སེམས་ཀྱི་འགོ་བརྩོམ་པ་འདིའོ།
No comments:
Post a Comment