དབང་གི་མཚན་ཉིད་དང་དབྱེ་བ།
༄༅། །སྔགས་ཀྱི་འཇུག་སྒོ་གང་ཞིག སྔགས་ལམ་ཉན་སྒོམ་བྱེད་པ་དང་མཆོག་ཐུན་གྱི་དངོས་གྲུབ་སྒྲུབ་པར་བྱེད་པ་ལ་དབང་བའི་རིགས་སུ་གནས་པ་དེ། སྨིན་བྱེད་རྒྱུའི་དབང་གི་མཚན་ཉིད། དེ་ལ་དབྱེ་ན་བུམ་དབང་། གསང་དབང་། ཤེར་དབང་། དབང་བཞི་བ་སྟེ་དེ་ལས་མང་མི་དགོས་ཉུང་ན་མི་འདུ་བའི་ཕྱིར།
༡༽ དབང་བཞི་གང་རུང་གང་ཞིག གཙོ་བོར་ལུས་ཀྱི་དྲི་མ་རགས་པ་སྦྱོང་ཞིང་། བསྐྱེད་རིམ་བསྒོམ་པ་ལ་དབང་བ་དང་སྐུ་རྡོ་རྗེའི་ལག་རྗེས་འཇོག་ཅིང་སྤྲུལ་སྐུ་འགྲུབ་པའི་ནུས་པ་ཁྱད་པར་འཇོག་པའི་རིགས་སུ་གནས་པ་དེ། བུམ་དབང་གི་མཚན་ཉིད། དེ་ལ་དབྱེ་ན་མི་བསྐྱོད་པ་ཆུའི་དབང་། རིན་འབྱུང་ཅོད་པན་གྱི་དབང་། འོད་དཔག་མེད་རྡོ་རྗེའི་དབང་། དོན་ཡོད་གྲུབ་པ་དྲིལ་བུའི་དབང་། རྣམ་པར་སྣང་མཛད་མིང་གི་དབང་སྟེ་ཐུན་མོང་བ་རིག་པའི་དབང་ལྔ་དང་། ཐུན་མོང་མ་ཡིན་པ་རྡོ་རྗེ་སློབ་དཔོན་གྱི་དབང་སྟེ་དྲུག་ཡོད་པའི་ཕྱིར།
གཞན་ཡང་དེ་ལ་དབྱེ་ན་མེ་ཏོག་ཕྲེང་བའི་དབང་། རིག་པའི་དབང་ལྔ། མེ་ལོང་། སློབ་དཔོན། རྗེས་གནང་སྟེ་དགུའམ། རིག་པའི་དབང་ལྔའི་སྟེང་དུ། སྔགས་དབང་། རྡོ་རྗེ་བརྟུལ་ཞུགས་ཀྱི་དབང་། སྤྱོད་པའི་བརྟུལ་ཞུགས་ཀྱི་དབང་། ལུང་བསྟན་དབུགས་དབྱུང་གི་དབང་། སློབ་དཔོན་གྱི་དབང་། མཐའ་རྟེན་གྱི་དབང་སྟེ་བཅུ་གཅིག་དང་། སོགས་སྒྲས་སྦས་དོན་ཀུན་གསལ་ལས་གསུངས་པའི་བུམ་དབང་བཅུ་དང་། ཀུན་རིག་ཊཱིཀ་ཆེན་ལས་གསུངས་པའི་བུམ་དབང་བཅུ་གཅིག་རྣམས་ཀྱང་ཡོད་པའི་ཕྱིར། བུམ་དབང་ལས་གཞན་པའི་དབང་ཕྱི་མ་གསུམ་གྱི་ངོ་བོ་ཡོད་དེ།
༢༽ དབང་བཞི་གང་རུང་གང་ཞིག གཙོ་བོར་ངག་ཀྱི་དྲི་མ་རགས་པ་སྦྱོང་ཞིང་། རླུང་སེམས་ཙམ་ལས་གྲུབ་པའིསྒྱུ་མའི་སྐུ་འགྲུབ་པ་ལ་དབང་བ་དང་། གསུང་རྡོ་རྗེའི་ལག་རྗེས་འཇོག་ཅིང་ལོངས་སྐུ་འགྲུབ་པའི་ནུས་པ་ཁྱད་པར་ཅན་འཇོག་པའི་རིགས་སུ་གནས་པ་དེ། གསང་དབང་གི་མཚན་ཉིད།
༣༽ དབང་བཞི་གང་རུང་གང་ཞིག གཙོ་བོར་ཡིད་ཀྱི་སྒྲིབ་པ་རགས་པ་སྦྱོང་ཞིང་། རིམ་པ་བཞི་པ་འོད་གསལ་ཕྱག་རྒྱ་ཆེན་པོ་བསྒོམ་པ་ལ་དབང་བ་དང་། ཐུགས་རྡོ་རྗེའི་ལག་རྗེས་འཇོག་ཅིང་ཆོས་སྐུ་འགྲུབ་པའི་ནུས་པ་ཁྱད་པར་ཅན་འཇོག་པའི་རིགས་སུ་གནས་པ་དེ། ཤེར་དབང་གི་མཚན་ཉིད།
༤༽ དབང་བཞི་གང་རུང་གང་ཞིག སྒོ་གསུམ་ཀྱི་དྲི་མ་བགས་ཆགས་དང་བཅས་པ་སྦྱོང་ཞིང་། བདེན་གཉིས་དབྱེར་མེད་ཟུང་འཇུག་གི་རྫོགས་རིམ་བསྒོམ་པ་ལ་དབང་བ་དང་། སྐུ་ཐུགས་ཟུང་འཇུག་གི་ལག་རྗེས་འཇོག་ཅིང་ཟུང་འཇུག་རྡོ་རྗེ་འཆང་གི་སྐུ་མངོན་དུ་འགྱུར་བའི་ནུས་པ་ཁྱད་པར་ཅན་འཇོག་བྱེད་དེ། དབང་བཞི་པ་ཚིག་དབང་རིན་པོ་ཆེའི་མཚན་ཉིད་ཡིན་པའི་ཕྱིར།
སྔགས་རིམ་ཆེན་མོ།
།ནང་དབང་ནི་དབང་དང་པོ་མིན་པ་ལ་ཕྲེང་བར་མི་གསལ་ཡང་བི་བྷཱུ་ཏཱིས་སྔ་མ་དང་འདྲ་བར་བཤད་པ་ཕྲེང་བའི་དགོངས་པ་ཡིན་པས་ལྷག་མ་རྣམས་ལ་ཡང་སྦྱར་རོ། །ཕྲེང་བར་དབང་ལྷ་བསྟིམ་པ་དང་སློབ་མ་ལ་ཆུ་དབང་བསྐུར་བའི་རྗེས་སུ་རིགས་བདག་གིས་རྒྱས་འདེབས་པ་དང་དེ་ལ་མཆོད་པ་བྱེད་པ་སློབ་དཔོན་གྱི་དབང་གི་སྐབས་མིན་པར་མ་གསུངས་ཀྱང༌། ལྭ་བ་པ་དང་བྷཱ་བ་བྷ་དྲ་དང་དཱ་རི་ཀ་པས་དབང་གི་ལྷ་བསྟིམ་པར་བཤད་ལ་སྟིམ་ཚུལ་ནི་དང་པོ་གཉིས་ཀྱིས་བ་སྤུའི་བུ་ག་ནས་གཞུག་པར་བཤད་པ་ལྟར་རོ། །ཐབས་གང་གིས་གཞུག་པ་ནི། ལྭ་བ་པས་སློབ་དཔོན་གྱི་ཐུགས་ཀའི་ས་བོན་གྱི་འོད་ཟེར་གྱིས་བཀུག་ནས་མཛད་པ་ལྟར་རོ། །དབུ་བརྒྱན་པ་ལ་ལྭ་བ་པས་དང་པོ་ལ་སྤྱི་གཙུག་ཏུ་མི་བསྐྱོད་པ།གཉིས་པ་ལ་རྣ་ལྟག་གཡས་སུ་རིན་འབྱུང༌། གསུམ་པ་ལ་ལྟག་པར་འོད་དཔག་མེད། བཞི་པ་ལ་རྣ་ལྟག་གཡོན་དུ་དོན་གྲུབ། ལྔ་པ་ལ་འཚོགས་མར་རྣམ་སྣང་རྣམས་ཆུ་ལས་གྲུབ་པར་བསམ་པར་བཤད་དེ། འདིའི་ལྟར་ན་དབང་ལྔ་ཀ་ལོག་པས་རིགས་ལྔའི་དབུ་རྒྱན་བྱེད་ཀྱི། ཅོད་པན་གྱི་དབང་གི་སྐབས་སུ་རིགས་ལྔས་དབུ་བརྒྱན་པ་མ་བྱུང་ངོ༌། །དེ་ལ་མཆོད་པར་ལྭ་བ་པ་དང་དཱ་རི་ཀ་པས་བཤད་པ་ལྟར་མེ་ཏོག་ལ་སོགས་པས་མཆོད་པར་ཡང་བྱའོ། །དཱ་རི་ཀ་པས། མཆོད་དེ་དག་པ་སྦྱིན་པར་བྱ། །ཞེས་དག་པ་སྦྱིན་པར་གསུངས་པ་ནི། ལྭ་བ་པས་དབང་ལྔ་པོ་དེ་རང་བཞིན་རྣམ་དག་གི་ཆོས་ཉིད་དང་ཉོན་ཡིད་དང་ཡིད་ཤེས་དང་སྒོ་ལྔའི་རྣམ་ཤེས་དང་ཀུན་གཞི་གནས་གྱུར་པའི་ཆོས་དབྱིངས་ཡེ་ཤེས་དང་མཉམ་ཉིད་དང་སོར་རྟོག་དང་བྱ་བ་ནན་ཏན་དང་མེ་ལོང་ལྟ་བུའི་ཡེ་ཤེས་ཀྱི་རང་བཞིན་དུ་བཤད་ལ། ཕྲེང་བ་ལས་ཀྱང་དབང་ལྔས་ཡེ་ཤེས་དེ་དག་གི་ས་བོན་རྒྱས་པར་བྱེད་པའི་ཕྱིར་དེ་དག་གི་བདག་ཉིད་དུ་མོས་པར་བྱའོ་ཞེས་བཤད་ལ། སྡོམ་འབྱུང་ལས། དབང་ལྔ་དེ་བཞིན་གཤེགས་བདག་ཉིད། །ཅེས་དང༌། པྲཛྙཱ་རཀྵི་ཏས་ཕུང་པོ་ལྔ་དང་ཉོན་མོངས་ལྔ་དག་པ་ཡང་དབང་ལྔར་བཤད་པ་དང༌། རྒྱལ་བ་བཟང་པོས། གང་ཞིག་དེ་ལྟར་དབང་བསྐུར་བས། །དངོས་གྲུབ་ཏུ་འགྱུར་ཐེ་ཚོམ་མེད། །ལྷ་གང་མངོན་དུ་བྱས་པ་ཡི། །དེ་ཡི་ལས་གང་སྒྲུབ་པར་ནུས། །ཞེས་རིག་པའི་དབང་ལྔའི་རྗེས་སུ་གསུངས་པའི་དོན་རྣམས་སློབ་མ་ལ་གོ་བར་བྱེད་པའོ། །གུར་གྱི་བཞི་པ་ལས་ཀྱང༌། གང་གང་སྣང་བ་དེ་ཀུན་དང༌། །དེ་རང་གཙོ་བོ་ཧེ་རུ་ཀ །ཆོས་རྣམས་རང་བཞིན་གྱིས་དག་པས། །སངས་རྒྱས་ཡེ་ཤེས་སུ་གང་བལྟའོ། །ཞེས་དབང་ལྔའི་རྗེས་སུ་གསུངས་པ་འདི་དཀྱིལ་ཆོག་གཞན་མང་པོ་ལས་ཀྱང་བཤད་ལ། དེའི་དོན་ནི། ལྷའི་རིགས་ཀྱི་བློ་གྲོས་ཀྱིས་ཕྲེང་བ་ནས་མིང་དབང་གི་བར་གང་གང་སྣང་བ་དེ་དང་དེ་སངས་རྒྱས་ཀྱི་ཡེ་ཤེས་ལྔ་དང་ཆོས་ཉིད་རྣམ་པར་དག་པའི་དབྱིངས་དང་དྲུག་ཏུ་བལྟ་སྟེ་ཕྲེང་བའི་དབང་ནི་དྲུག་པར་བལྟའོ། །རྐང་པ་ཐ་མའི་གང་ཞེས་པ་གང་གི་ཕྱིར་གྱི་དོན་ཡིན་པས་དེའི་རྒྱུ་མཚན་ནི། ཆོས་རྣམས་རང་བཞིན་དག་དྲི་མེད། །ཅེས་བཏོན་ནས་རང་བཞིན་གྱིས་དག་པའི་སངས་རྒྱས་ཀྱི་ཆོས་མེ་ལོང་ལྟ་བུའི་ཡེ་ཤེས་ལ་སོགས་པ་དྲུག་གི་གེགས་ཀྱི་དྲི་མ་དབང་དེ་དག་གིས་འཁྲུད་ཅིང་དེ་དག་དང་རང་བཞིན་དབྱེར་མེད་པའི་ཕྱིར་དེ་དག་ཏུ་མོས་པ་བྱའོ། །དཀྱིལ་འཁོར་གྱི་གཙོ་བོ་ནི། དེ་དག་ཀུན་གྱི་རང་བཞིན་ཡིན་ལ། ཧེ་རུ་ཀ་ནི་མཚོན་པ་ཙམ་མོ་ཞེས་འཆད་དེ། དབང་ལྔ་ལ་ཡེ་ཤེས་ལྔར་ལྟ་བའི་དོན་དུ་འཆད་དོ།།དེ་ལ་ཆུས་གཏོར་བ་སོགས་དང་དབུ་རྒྱན་མགོ་ལ་བསྐོན་པ་དང་རྡོར་དྲིལ་ལག་ཏུ་གཏད་པ་དང་མིང་བཏགས་པ་རྣམས་ནི་དབང་ལྔ་པོ་དེའི་རྒྱུ་ཡིན་གྱི་ངོ་བོ་མ་ཡིན་པས། ངོ་བོ་ནི་ཆུ་དབང་ལ་མཚོན་ན་དབང་བསྐུར་ས་མི་བསྐྱོད་པར་བསྐྱེད་ཅིང་དབང་རྫས་མི་བསྐྱོད་པ་ཞུ་བའི་ཆུས་སྐུར་ཚུལ་སྤྱི་བོར་གཏོར་བ་སོགས་ཀྱི་བྱེད་པ་དང༌། བསྒྲུབས་པའི་དཀྱིལ་འཁོར་བའི་ལྷ་ཆུ་དབང་སྐུར་བ་ལ་དགོངས་པ་གཏད་པ་རྣམས་དང་གསར་དུ་སྤྱན་དྲངས་པའི་དབང་ལྷ་མི་བསྐྱོད་པས་གཙོ་མཛད་པ་རྣམས་ལ་གསོལ་བ་བཏབ་ནས། དངོས་སུ་བླ་མས་བསྐུར་བའི་མཛད་པ་ལ་བརྟེན་ནས་སློབ་མ་དེའི་རྒྱུད་ལ་རྣམ་ཤེས་ཀྱི་ཕུང་པོ་དང་ཞེ་སྡང་སྦྱོང་བ་དང་ཆོས་དབྱིངས་ཡེ་ཤེས་མངོན་དུ་བྱེད་པ་དང༌། མི་བསྐྱོད་པའི་སྒོ་ནས་ཀྱི་བསྒོམ་བཟླས་དང་དངོས་གྲུབ་སྒྲུབ་པ་ལ་དབང་བའི་ནུས་པ་ཁྱད་པར་བ་ཞིག་བསྒོམ་པ་ལ་ཆུ་དབང་དུ་བྱ་སྟེ། གཞན་བཞི་དང་མེ་ཏོག་ཕྲེང་བའི་དབང་ལ་ཡང་དེའི་རིགས་པ་སྦྱར་རོ། །དེས་ན་དབང་ལྔའི་དང་པོའ་ིཆུ་དབང་དང་དབང་གཞན་ལ་མཐའ་རྟེན་ཆུ་དབང་བསྐུར་བ་གཉིས་ཀྱང་མི་གཅིག་གོ །དེ་དག་ལ་རིག་པའི་དབང་ཞེས་གསུངས་པའི་སྒྲ་དོན་ནི། ཕྲེང་བ་ལས། ཕྲེང་བ་དང་ཆུ་ལ་སོགས་པ་དབང་དྲུག་པོ་འདི་རྣམས་མ་རིག་པའི་གཉེན་པོ་ནུས་པ་ཉིད་དུ་སྒྲུབ་པར་བྱེད་པས་རིག་པའི་དབང་ཞེས་བརྗོད་དེ། ཞེས་དང༌། ལྭ་བ་པས། མ་རིག་པ་ལྔ་ཡོངས་སུ་གྱུར་པའི་ངོ་བོ་རིག་པ་ཡེ་ཤེས་ལྔ་པོ་རྣམས་སྒྲུབ་པར་བྱེད་པའི་ཕྱིར་དང༌། ཐམས་ཅད་དུ་སངས་རྒྱས་སྤྱན་ལ་སོགས་པ་རིག་པའི་ལྷ་མོས་དབང་སྐུར་བར་བྱེད་པའི་ཕྱིར་རོ། །ཞེས་སྒྲའི་དོན་གཉིས་གསུངས་པའི་སྔ་མ་ནི་རིག་པ་སྒྲུབ་པའི་དབང་དང༌། ཕྱི་མ་ནི་རིག་པས་བསྐུར་བའི་དབང་ཡིན་པས་དབང་ཉིད་རིག་པར་འདོད་པ་མིན་ནོ། །ལྭ་བ་པས་ལྔ་པོ་འདི་ཐོབ་པས་སྔགས་དང་རྒྱུད་ཉན་བཤད་དང་སྒྲུབ་པ་ལ་དབང་ཞེས་སྤྱིར་གསུངས་ལ། ཕྲེང་བ་ལས་བྱ་སྤྱོད་ཀྱི་རྒྱུད་ཉན་བཤད་དང་སྔགས་སྒྲུབ་པ་ལ་དབང་གི རྣལ་འབྱོར་དང་རྣལ་འབྱོར་མའི་རྒྱུད་ཉན་བཤད་དང་སྔགས་སྒྲུབ་པ་ལ་མི་དབང་ཞེས་བཀག་པ་ནི།
No comments:
Post a Comment