བདུན་པ་བསླབ་བྱ་ཉེར་གཉིས་ལ། རྣལ་འབྱོར་ཐམས་ཅད་གཅིག་གིས་བྱ། །ཞེས་སོགས་ནི། འདི་ཉམས་སུ་ལེན་པ་པོས་དགེ་སྦྱོར་སྣེ་མང་པོ་མི་དགོས་པར་ཐམས་ཅད་བདག་གཞན་མཉམ་བརྗེའི་སེམས་ཀྱི་སྟེང་དུ་བསྒྲིལ་ཏེ། ཟས་ཟ་བ་ཡང་རང་ལུས་སེམས་ཅན་ལ་བྱིན་ཟིན་པས། སེམས་ཅན་གྱི་དོན་སྒྲུབ་ཕྱིར་ལུས་འདི་གསོ་སྙམ་པ་ལྟ་བུ་སྤྱོད་ལམ་གཞན་ཐམས་ཅད་ལ་དེ་བཞིན་སྦྱོར་ཞིང༌། གཞན་དུ་རིག་སྔགས་དང་བཀའ་བསྒོ་སོགས་ཐམས་ཅད་འདིའི་སྟེང་ནས་བྱེད། སྨན་པས་སྨན་གྱིས་མ་ཕན་ན་གཏར་སྲེག་བྱེད་པ་བཞིན་དུ། ན་ཚ་ཉོན་མོངས་ཀུན་གྱི་གཉེན་པོར་མཉམ་བརྗེའི་སེམས་གཅིག་པུ་འདིས་བརྒྱ་གོ་གཅིག་ཆོད་བྱ། ཀུན་སློང་འཆོས་པ་དང་བསྔོ་བ་གཉིས་དགེ་བ་ཀུན་གྱི་ཐོག་མཐར་བྱ་ཞིང༌། ཉིན་མོར་ཡང་འཕེན་པ་བཏང་བ་ལྟར་བྱེད་ཀྱིན་འདུག་མི་འདུག་བལྟ་བ་གལ་ཆེ། སྐྱིད་སྡུག་གཉིས་གང་བྱུང་ཡང་བློ་སྦྱོང་གི་ཉམས་ལེན་མ་ཤོར་བ་བྱེད་དགོས་ཀྱི། འགའ་ཞིག་གོ་ས་དང་འབྱོར་པ་སོགས་སྐྱིད་ཀྱིས་ཆོས་ཤོར། འགའ་ཞིག་ནི་དགྲ་སོགས་བྱུང་སྟེ་སྡུག་བསྔལ་བས་ཆོས་ཤོར་བ་ཡིན་པས། དེ་གཉིས་གང་བྱུང་ཡང་བློ་སྦྱོང་གི་ཉམས་ལེན་མ་ཤོར་བ་དགོས། ཆོས་སྤྱིའི་དམ་ཚིག་དང༌། བློ་སྦྱོང་གི་དམ་ཚིག་གཉིས་སྲོག་དང་བསྡོས་ཏེ་བསྲུང༌། ཉོན་མོངས་ངོས་ཟིན་དཀའ་བ་དང༌། གཉེན་པོ་བསྟེན་དཀའ་བ་དང༌། རྒྱུན་གཅོད་དཀའ་བ་གསུམ་ལ་ནན་ཏན་དུ་ཤེས་པར་བྱས་ནས་བསླབ། བླ་མ་བཟང་པོ་དང་མཇལ་བ་དང༌། བློ་ལས་སུ་རུང་བ། མཐུན་རྐྱེན་ཟས་གོས་ཚང་བ་སྟེ། ཆོས་བྱེད་པའི་རྒྱུའི་གཙོ་བོ་གསུམ་འཛོམ་ཐུབ་པའི་སྨོན་ལམ་འདེབས། བླ་མ་ལ་མོས་གུས་དང༌། བློ་སྦྱོང་ལ་སྤྲོ་བ་དང༌། དྲན་ཤེས་ཀྱིས་བསླབ་བྱ་བསྲུང་བ་གསུམ་ཉམས་པ་མེད་པར་བྱ། ལུས་ངག་ཡིད་གསུམ་དལ་བར་མ་བཞག་པར་དགེ་བ་ལ་བཀོལ། ལུས་ཀྱི་དགེ་བ་ནི་ཕྱག་སྐོར་སོགས་རྐྱང་པ་མིན་གྱི། ལུས་འདུག་ལུགས་དྲང་པོར་བསྲང་བ་ཚུན་ཀྱང་ལུས་ཀྱི་དགེ་བར་འགྲོ། བློ་སྦྱོང་བྱེད་ཡུལ་ཡང་དགྲ་དང་གཉེན་ཞེས་རིས་སུ་བཅད་པ་དང༌། སེམས་ཅན་དང་སེམས་ཅན་མིན་པ་སོགས་ལ་ཕྱོགས་རིས་མི་བྱེད་པར་སྦྱོང་བ་དང༌། དེ་ལྟའི་ཡུལ་ཐམས་ཅད་ལ་ཁྱབ་པར་བློ་གཏིང་ནས་འབྱོངས་པར་བྱེད་པ་མཆད་ཁ་བ་ལྟར་དགོས། ཁྱད་པར་དགྲ་ལ་བཟོད་པ་སོགས་སྐྱེ་དཀའ་བ་དང༌། ཡུལ་གཉན་པ་བླ་མ། ཕ་མ། ཤག་རོགས་ལྟ་བུ་ལ་ཟུར་དུ་བཀོལ་ནས་གཏིང་འབྱོངས་པར་བསྒོམ། དེ་ཡང་ཟས་གོས་སོགས་མཐུན་རྐྱེན་འཛོམས་མ་འཛོམས་ལ་མ་བལྟོས་པར་བསྒོམ་པ་ལས། ལྟོ་འགྲངས་ཉི་མས་དྲོས་ཚེ་ཆོས་པའི་གཟུགས། །རྐྱེན་ངན་ཐོག་ཏུ་བབས་ཚེ་ཐ་མལ་བ། །ཞེས་པ་ལྟ་བུར་མ་སོང་བ་བྱ། ད་རེས་བསྐྱེད་དཀའ་ལ་དོན་ཆེ་བའི་བྱང་ཆུབ་ཀྱི་སེམས་བསྒོམ་པ་སོགས་ཀྱང་རང་གཞན་གྱི་དོན་གཉིས་སྒྲུབ་པའི་ཆེད་དུ་བྱེད་པ་དགོས་ཀྱི། ཚེ་འདི་པའི་ཆེད་དུ་བྱ་མི་རིགས་ཏེ། ཚེ་འདི་ལས་ཕྱི་མ་དང༌། འཇིག་རྟེན་ལས་ཆོས། ཆོས་བཤད་སྒྲུབ་གཞན་བྱེད་པ་ལས་བློ་སྦྱོང་བསྒོམ་པ་གཙོ་བོར་བྱ་དགོས་པ་ཡིན་གསུངས།
གོ་ལོག་མི་བྱ། ཞེས་སོགས་ཀྱི་རིམ་བཞིན་གོ་ལོག་དྲུག་ལས། ཆོས་ཀྱི་བྱ་བ་ལ་སྙིང་རུས་དཀའ་སྤྱད་མི་བཟོད་པར་འཇིག་རྟེན་གྱི་བྱ་བ་ལ་དཀའ་སྤྱད་བཟོད་པའི་བཟོད་པ་གོ་ལོག་དང༌། ཐོས་བསམ་སྒོམ་གསུམ་སོགས་ཆོས་ཀྱི་རོ་མྱང་དགོས་ཀྱང༌། དེ་ལ་མི་རྟོག་པར། འཇིག་རྟེན་གྱི་གཏམ་དང་ཚོང་དང་དམག་སོགས་རྟོག་ཅིང་དཔྱོད་ལ་དེའི་རོ་མྱང་བ་རོ་མྱང་གོ་ལོག་དང༌། སྡིག་ཅན་ལ་སྙིང་རྗེ་མི་བསྒོམ་པར། ཆོས་ཕྱིར་དཀའ་བ་སྤྱོད་པ་ལ་སྙིང་རྗེ་བར་བྱེད་པ་སྙིང་རྗེ་གོ་ལོག་དང༌།
No comments:
Post a Comment