སྤྱོད་ལམ་ནི། སྟོན་པ་ཐུགས་རྗེ་ཅན་མྱ་ངན་ལས་འདས་སྐབས་བཞིན་དུ་སྤྱོད་ལམ་གཞོགས་གཡས་ས་ལ་ཕབ་ནས་སེང་གེའི་ཉལ་སྟབས་ཀྱིས་འཕོ་བ་སྟེ། འདི་ཙམ་གྱིས་ཀྱང་དག་ཞིང་དུ་བགྲོད་པ་ལ་ཁྱད་ཆེ། སྤྱིར་ན་སྐྱེས་བུ་ཆུང་ངུ་ལྟ་བུ་ནི་སྐྱབས་འགྲོའ་ིངང་ནས་འཕོ་ལ། སྐྱེས་བུ་ཆེན་པོ་ནི་བྱང་སེམས་བསྒོམ་བཞིན་དུ་འཕོ་བ་སོགས་དགོས། དེས་དག་ཞིང་དུ་བགྲོད་ལུགས་མེད་སྙམ་ན༑ དེ་ངེས་པར་ཡོད་དེ། མཆད་ཁ་བ་འདའ་ཀར་ཉེ་གནས་ལ་མཆོད་པ་ལ་འུར་གཤོམས་དང༌། ངས་སེམས་ཅན་ཐམས་ཅད་ཀྱི་དོན་དུ་མནར་མེད་དུ་འགྲོ་བ་སྨོན་པར་བྱས་ཀྱང༌། མི་འགྲོ་བར་འདུག །དག་ཞིང་གི་སྣང་བ་ཤར་བྱུང་གསུངས་པ་དང༌། དགེ་བཤེས་པོ་ཏོ་བས་ཀྱང་དེ་བཞིན་མཛད་ཚུལ། སྔར་མ་སྨད་གཉིས་ཆུས་ཁྱེར་བའི་ཚེ། གཉིས་ཀས་ཕན་ཚུན་སེམས་བཟང་པོ་བསྐྱེད་པས་དགའ་ལྡན་དུ་སྐྱེས་པ་དང༌། ཡང་ལྷོ་ཁའི་བྱ་སའི་ཀོ་བ་ཐེངས་ཅིག་ལྕི་དྲགས་ཏེ་རྡིབ་པར་ཉེ་བ་ན་བང་ཆེན་པ་ཞིག་སེམས་བཟང་པོ་བསྐྱེད་དེ་ཆུར་མཆོངས་ཀྱང་མ་ཤི་བར་འཇའ་ཟུག་པ་བྱུང་བ་ལྟར་སེམས་བཟང་ཚུལ་ཁྱད་པར་ཅན་བྱང་ཆུབ་ཀྱི་སེམས་བཅོས་མ་ཚུན་གསལ་བཏབ་ན་ནི། གནས་བཟང་བར་སྐྱེ་བར་ཐེ་ཚོམ་མེད། ང་ཚོས་ཧིཀ་དང་ཕཊ་ཟེར་བའི་འཕོ་བ་ལ་འགངས་ཆེར་བྱེད་ཅིང༌། འཕོ་བའི་རྟགས་ཐོན་པ་ལ་རྩ་བ་ཆེ་བར་བརྩི་ཡང༌། དམིགས་པ་གང་ཡང་མེད་པར་ཧིཀ་མང་དུ་སྦྱང་ན་སྤྱི་གཙུག་ཏུ་འཕོ་རྟགས་ཐོན་པ་སོགས་འབྱུང་བས་དེ་རླུང་གི་འཕྲུལ་ཡིན་པ་ལས་དེ་ཙམ་ངོ་མཚར་ཆེ་རྒྱུ་མེད། བློ་སྦྱོང་གི་འཕོ་བ་ལ། ཧིཀ་དང་ཕཊ་མེད་ཀྱང་འཕོ་བ་ཐམས་ཅད་ལས་ཟབ་ཤོས་འདི་ཡིན་པས། འཕོ་བ་གཞན་ཉམས་སུ་བླངས་ཀྱང་འཆི་ཁར་ངན་སོང་གི་སྐྱེ་སྒོ་ཁེགས་མི་ཁེགས་ཐེ་ཚོམ་ཡོད་ལ། འདིའི་སྟོབས་ལྔའི་སྒོ་ནས་འཕོས་ན་ནི། སྐྱེ་གནས་ངན་པར་མི་ལྟུང་བ་ངེས་པ་ཅན་ཡིན་གསུངས།
དོན་ཚན་ལྔ་པ། བློ་འབྱོངས་པའི་ཚད་ནི། ཆོས་ཀུན་དགོངས་པ་གཅིག་ཏུ་འདུས། །ཞེས་པ་སྟེ། བཅོམ་ལྡན་འདས་ཀྱིས་ཆོས་ཕུང་ཇི་སྙེད་ཅིག་གསུངས་པ་ཐམས་ཅད་བདག་གཅེས་འཛིན་གྱི་གཉེན་པོར་གཞོལ་ཞིང་འབབ་ལ། ཆོས་དང་ཆོས་མིན་པའི་གནམ་ཐིག་ཀྱང་ཉོན་མོངས་ཀྱི་གཉེན་པོར་སོང་མ་སོང་ལ་གསུངས་ཤིང༌། གྲུབ་རྟགས་ཀྱི་མཆོག་ཉོན་མོངས་ཇེ་ཆུང་ལ་སོང་བ་སྟེ༑ དེ་མིན་པར་གནམ་ལ་བྱ་རྒོད་སོགས་ཀྱིས་ཀྱང་འཕུར། ས་ལ་བྱི་བའང་འཛུལ། ཆུ་ལ་ཉས་ཀྱང་འཕྱོ་བའི་ཕྱིར་ན་གྲུབ་རྟགས་གཞན་ལ་ཏིག་པོ་མེད། བློ་སྦྱོང་འདི་ལ་ཆོས་དང་ཆོས་མིན་བརྟགས་པའི་སྲང་དུ་གསུངས་པས། ཆོས་བྱས་པའི་ལག་རྗེས་ལ་བདག་གཅེས་འཛིན་ཆུང་དུ་སོང་བར་འདུག་ན་འབྱོངས་པའོ། །དཔང་པོ་གཉིས་ཀྱི་གཙོ་བོར་བཟུང༌། །ཞེས་པ་ནི། རང་གཞན་གྱི་དཔང་པོ་གཉིས་ཏེ། རང་ལ་ཉམས་ལེན་གཤའ་མ་མེད་ཀྱང་ཚུལ་འཆོས་བགྱིས་ཏེ། གཞན་གྱིས་ཚད་དུ་འཛིན་ཅིང༌། ཚུལ་ཁྲིམས་གཙང་མདོག་ཁ་ལ་བཟང་པོར་བརྩི་བ་ཙམ་བྱུང་ཡང༌། དེ་ཙམ་ནི། ཨ་མྲའི་འབྲས་བུ་ཕྱི་ནང་སྨིན་མ་སྨིན་རིགས་བཞིར་གསུངས་པ་ལས་ཕྱི་སྨིན་ལ་ནང་མ་སྨིན་པ་དང་འདྲ་བས། བྱི་ལ་འཇབ་པའི་གཡོ་འཕྲུལ་ཅན་དེ་ལྟ་བུ་ལ་ཆོས་གཞན་མི་ཤེས་པ་དག་གིས་བཟང་པོའ་ིགྲལ་དུ་འཛིན་མོད། དེ་འདྲ་བ་དག་མི་བྱ་ཞིང༌། གཞན་ཡང་ནང་སྨིན་ལ་ཕྱི་མི་སྨིན་པའང་མིན་པར། ཕྱི་དུལ་བས་གཞན་གྱིས་ཁྲེལ་མ་དགོས་པ་དང༌། ནང་དུལ་བས་རང་རྒྱུད་ཉམས་ལེན་གྱིས་ཕྱུག་པའི་ཕྱི་གཙང་ནང་གཙང་བ་དགོས།
No comments:
Post a Comment