དེ་ནས་སྦྱོར་བས་བསྒྱུར་བ་ལ། སྦྱོར་བ་བཞི་ནི།
- ཚོགས་གསོག །
- སྒྲིབ་སྦྱོང༌།
- འབྱུང་པོར་གཏོར་མ་བཏང་བ།
- ཆོས་སྲུང་ལ་འཕྲིན་ལས་བཅོལ་བ་སྟེ།
བཞི་པ་ཚེ་གཅིག་གི་ཉམས་ལེན་བསྒྲིལ་ནས་སྟོན་པ་ལ། སྟོབས་ལྔ་སྟེ།
- དཀར་པོ་ས་བོན་གྱི་སྟོབས།
- གོམས་པའི་སྟོབས།
- འཕེན་པའི་སྟོབས།
- རྣམ་པར་སུན་འབྱིན་པའི་སྟོབས།
- སྨོན་ལམ་གྱི་སྟོབས་སོ། །
དཀར་པོ་ས་བོན་གྱི་སྟོབས་ནི། བྱང་ཆུབ་ཀྱི་སེམས་འཕེལ་བའི་ཕྱིར། སྦྱོར་ཆོས་སོགས་ཀྱི་སྒོ་ནས་ཚོགས་བསགས་སྒྲིབ་སྦྱང་བྱེད་པ་ཡིན། རང་ཚོས་དགེ་བ་བྱས་ཚད་ཚེ་འདི་པ་ལ་ཤོར་བ་ཕལ་ཆེ་བས་དེ་ལྟར་མ་སོང་བ་གལ་ཆེ།
གོམས་པའི་སྟོབས་ནི། འགྲོ་འཆག་ཉལ་འདུག་གི་སྐབས་ཀུན་ཏུ་བྱང་ཆུབ་ཀྱི་སེམས་གཉིས་འཕེལ་ཐབས་ལ་སྦྱངས་ཏེ་སྒྲུབ་པ་རྒྱུན་མི་འཆད་པ་བྱེད་པ་ཡིན། བྱང་སེམས་བདག་ཉིད་ཆེན་པོ་རྣམས་ཀྱིས་རང་ཅག་གི་བློར་མི་ཆུད་ཅིང༌། ལག་ལེན་དུ་བྱེད་པར་དཀའ་བའི་བྱང་སེམས་ཀྱི་སྤྱོད་པ་མགོ་དང་རྐང་ལག་སྦྱིན་པར་བཏང་བ་སོགས་ཀྱང་བློ་གོམས་པ་ལས་བྱུང་བ་ཡིན་ཏེ། དང་པོར་མི་ཤེས་པའི་ལྕགས་བཟོ། ཤིང་བཟོ་སོགས་ཀྱང་རྗེས་སུ་ཤེས་པ་ན་མི་དཀའ་བ་བཞིན་དུ་རང་གི་ལུས་སྲོག་སྦྱིན་པར་གཏོང་བའང༌། ཕྱིས་གོམས་པ་ན་སྔོ་ཚོད་སྟེར་བ་ཙམ་དུ་ལས་སླ་བ་འབྱུང་སྟེ། གོམས་ན་སླ་བར་མི་འགྱུར་བའི། །དངོས་དེ་གང་ཡང་ཡོད་མ་ཡིན། །ཞེས་གསུངས། སྔོན་གྱི་སྐྱེས་ཆེན་འགའ་རེས་ཆིབས་རྟ་ལ་ཆིབས་པ་ན། ཞབས་ཡ་གཅིག་ཡོབ་ཏུ་བཙུད་ནས། ཅིག་ཤོས་རྒྱབ་ཀྱི་ཡོབ་ལ་མ་བཙུད་པའི་བར་ནའང༌། ལམ་རིམ་ལ་བཤར་སྒོམ་ཚར་བ་ཡོད་པར་གསུངས་པའང་གོམས་པ་ལས་བྱུང༌། གོམས་པ་དང་བསྒོམ་པ་དོན་གཅིག་ཅིང༌། རང་རེས་ཇ་ཕོར་གང་ཙམ་འཐུང་བ་ལའང་མ་གོམས་ན་ལས་སླ་བ་ཇི་ལྟར་འབྱུང༌།
རྣམ་པར་སུན་འབྱིན་པའི་སྟོབས་ནི། གཅེས་འཛིན་ཁོ་ནམ་སྐྱེས་པ་ན་དགག་སྟེ་ཁྱི་རྐུན་བརྡུང་བ་ལྟར་འབུར་འཇོམས་བྱས་ལ་གཅེས་འཛིན་སུན་དབྱུང་བ་ཡིན།
སྨོན་ལམ་གྱི་སྟོབས་ནི། ཉིན་རེའི་དགེ་རྩ་གང་བྱས་པ་རྣམས་དོ་ནུབ་ཉལ་ཁར་བྱང་ཆུབ་ཀྱི་སེམས་གཉིས་འཕེལ་ཆེད་དུ་བསྔོ་བའོ། །དེ་ནི་ཚེ་འདིའི་སྟོབས་ལྔ་ཡིན་ལ།
No comments:
Post a Comment