ཡུལ་གསུམ་དུག་གསུམ་དགེ་རྩ་གསུམ། །
ཞེས་པ་ནི། ཡུལ་ཡིད་དུ་འོང་མི་འོང་བར་མ་གསུམ་ལ་དམིགས་ནས་ཆགས་སྡང་སོགས་སྐྱེ་བ་ན། ཡུལ་གསུམ་པོ་གང་རུང་དེ་དང་དེ་ལ་དམིགས་ནས་སེམས་ཅན་གཞན་རྒྱུད་ལ་ཆགས་སྡང་སོགས་ཀྱི་ཉོན་མོངས་གང་སྐྱེས་པ་དེ་ཐམས་ཅད་དང༌། དེ་གསུམ་ལ་བརྟེན་པའི་ངན་འགྲོ། འཁོར་བའི་སྡུག་བསྔལ་རྒྱུ་དང་བཅས་པ་ཐམས་ཅད་རང་སྟེང་དུ་བླངས་ནས། སེམས་ཅན་ཐམས་ཅད་ཆགས་སྡང་གཏི་མུག་མེད་པའི་དགེ་རྩ་དང་ལྡན་པར་བྱས་སོང་སྙམ་པའང་རེ་རེ་བཞིན་དུ་བྱེད། རྐྱེན་ངན་པ་འཐབ་རྩོད་དང་ན་ཚ་སོགས་ཐམས་ཅད་ཀྱི་ལན་རྩ་གཅེས་འཛིན་དུ་མཐོང་ནས། རང་གི་ལས་ངན་པའི་འབྲས་བུ་ཟད་པའི་རྒྱུ་དང༌། གཞན་གྱི་སྡུག་བསྔལ་བླངས་པ་རྣམས་སྨིན་པར་ཤེས་ནས་ཡིད་བདེ་བ་འབའ་ཞིག་བྱེད་པ་དེའི་ཕྱིར་བློ་སྦྱོང་བསྒོམ་པ་དེ་ལ་རྐྱེན་ངན་གྲོགས་སུ་ཤར་ནས་ཡིད་མི་བདེ་བ་མི་འབྱུང་བས། བློ་སྦྱོང་ལ་གྲོང་ཁྱེར་སྐྱིད་པའི་འབྱུང་གནས་ཞེས་པའི་ཐ་སྙད་མཛད། རྐྱེན་ངན་ཅུང་ཟད་ཙམ་ཡང་མི་ཐེག་པ་མི་བྱེད་པར། དཔེར་ན་ཚོང་པ་ལམ་དུ་འགྲོ་བའི་ཚེ་ཆར་བབས་པ་རྐུན་མ་མི་འབྱུང་བ་དང༌། ཁ་བ་བབས་པ་འགེལ་ཁལ་རྨིག་པ་མི་འཐེང་བའི་གྲོགས་སུ་འཁྱེར་བ་བཞིན་དགོས།
སྤྱོད་འཇུག་ལས།
གལ་ཏེ་བཅོས་སུ་ཡོད་ན་ནི། །
དེ་ལ་མི་དགར་ཅི་ཞིག་ཡོད། །
གལ་ཏེ་བཅོས་སུ་མེད་ན་ནི། །
དེ་ལ་མི་དགའ་བྱས་ཅི་ཕན། །
ཞེས་པ་ལྟར། སྡུག་བསྔལ་བྱུང་བ་ན་ཡིད་མི་བདེ་བ་བྱས་ཀྱང་དེས་ཅིའང་མི་ཕན་པས་གྲོགས་སུ་འཁྱེར་དགོས། དེ་ཡང་འགའ་ཞིག་ལ་ན་ཚ་སོགས་ཀྱིས་མནར་ཏེ་མ་ཤི་ཙམ་བྱུང་བ་ན། ལམ་རིམ་སོགས་ལ་ཐོས་པ་བྱས་པ་ལྟ་བུ་མིན་ཀྱང་མི་རྟག་པའི་བློ་རང་འཁྲུངས་ལྟ་བུར་འབྱུང་བ་མཐོང་ཆོས་སུ་ཡོད། དེ་ལྟར་རྐྱེན་ངན་པ་བྱུང་ཚེ་ང་རང་ཅི་བྱུང་ཡང་རུང༌། སེམས་ཅན་ཐམས་ཅད་ཀྱི་ཆགས་ཆེ་ཉམ་ང་བདག་གི་སྟེང་དུ་འབབ་པར་ཤོག་སྙམ་དུ་བསམ་ན་ཕན་ཡོན་དེ་ལས་ཆེ་བ་མེད་ཚུལ་དང༌། སླར་ཡང་རྐྱེན་ངན་བྱང་ཆུབ་ཀྱི་ལམ་དུ་བསྒྱུར་བའི་བསམ་པས་བསྒྱུར་ཚུལ་ཡན་གྱི་བསྐྱར་བཤད་གནང༌།
No comments:
Post a Comment