སེམས་དང་སེམས་ལས་བྱུང་བ་ནི། །སེམས་དང་ཡིད་དང་རྣམ་ཤེས་རྣམས། །དོན་གཅིག་མིང་གི་རྣམ་གྲངས་ཡིན། །དབྱེ་ན་མིག་གི་རྣམ་ཤེས་ནས། །ཡིད་ཀྱི་རྣམ་ཤེས་བར་དྲུག་ཡོད། །སེམས་བྱུང་ལྔ་བཅུ་རྩ་གཅིག་སྟེ། །ཀུན་འགྲོ་ལྔ་དང་ཡུལ་ངེས་ལྔ། །དགེ་བ་བཅུ་གཅིག་རྩ་ཉོན་དྲུག །ཉེ་ཉོན་ཉི་ཤུ་གཞན་འགྱུར་བཞིའོ། །ཚོར་བ་འདུ་ཤེས་སེམས་པ་དང་། །ཡིད་ལ་བྱེད་དང་རེག་པ་ལྔ། །གཙོ་སེམས་ཀུན་གྱི་འཁོར་དུ་ནི། །འགྲོ་ཕྱིར་ཀུན་འགྲོ་ཞེས་བྱའོ། །འདུན་པ་མོས་པ་དྲན་པ་དང་། །ཏིང་འཛིན་ཤེས་རབ་ལྔ་པོ་ཡུལ། །བྱེ་བྲག་པ་ལ་འཇུག་ངེས་ཕྱིར། །ཡུལ་ངེས་ཞེས་པར་བཤད་པ་ཡིན། །དད་དང་ངོ་ཚ་ཤེས་ཁྲེལ་ཡོད། །འདོད་ཆགས་དང་ནི་ཞེ་སྡང་དང་། །གཏི་མུག་མེད་པའི་དགེ་རྩ་གསུམ། །བརྩོན་འགྲུས་ཤིན་སྦྱངས་བག་ཡོད་དང་། །བཏང་སྙོམས་རྣམ་པར་མི་འཚེ་རྣམས། །གཉེན་པོ་ངོ་བོ་མཚུངས་ལྡན་སོགས། །ཅི་རིགས་སྒོ་ནས་དགེ་བའོ། །འདོད་ཆགས་ཁོང་ཁྲོ་ང་རྒྱལ་དང་། །མ་རིག་ཐེ་ཚོམ་ལྟ་བ་དྲུག །རྩ་ཉོན་ཡིན་ཏེ་སེམས་རྒྱུད་ནི། །ཉོན་མོངས་བྱེད་པའི་གཙོ་བོ་འོ། །ཁྲོ་བ་ཁོན་འཛིན་འཆབ་དང་འཚིག །ཕྲག་དོག་སེར་སྣ་སྒྱུ་དང་གཡོ། །རྒྱགས་དང་རྣམ་འཚེ་ངོ་ཚ་མེད། །ཁྲེལ་མེད་རྨུགས་རྒོད་མ་དད་དང་། །ལེ་ལོ་བག་མེད་བརྗེད་ངས་དང་། །ཤེས་བཞིན་མ་ཡིན་རྣམ་གཡེང་བཅས། །ཉི་ཤུ་རྩ་ཉོན་འཕེལ་སྐྱེ་དང་། །ཉེ་ཕྱིར་ཉེ་བའི་ཉོན་མོངས་སོ། །གཉིད་འགྱོད་རྟོག་དཔྱོད་གཞན་འགྱུར་ཏེ། །ཀུན་སློང་མཚུངས་ལྡན་ཅི་རིགས་ཀྱིས། །དགེ་དང་མི་དགེ་ལུང་མ་བསྟན། །གཞན་དང་གཞན་དུ་འགྱུར་བའོ། །
No comments:
Post a Comment