གཞན་ཡང་། རྣམ་བཤེད་ལས། འདི་ལྟ་གསུངས་པའི་ཟུར་གཉིས་པ་སྒྲུབ་པའི་རྣམ་པར་རྟོགས་བྱ་མ་ཡིན་པར། ཞེས་པའི་སྒྲུབ་པ་དེ་དགག་སྒྲུབ་གཉིས་སུ་ཕྱེ་བའི་སྒྲུབ་པ་ལ་བྱེད་རིགས་པར་ཐལ། ཁྱོད་ཀྱི་ཞེ་འདོད་ཡོད་པའི་ཕྱིར། འདོད་མི་ནུས་ཏེ། དེ་ཀུན་རྫོབ་པའི་རྣམ་པར་རྟོགས་བྱ་ལ་བྱེད་རིགས་པའི་ཕྱིར། དེར་ཐལ། དེ་གཉིས་སྣང་དང་བཅས་པའི་ཚུལ་གྱིས་རྟོགས་པར་བྱ་བ་ལ་བྱེད་རིགས་པའི་ཕྱིར།
སྤྱོད་འཇུག་རྣམ་བཤད་ལས། རང་མངོན་སུམ་དུ་རྟོགས་པའི་མངོན་སུམ་ཚད་མས་གཉིས་སྣང་དང་བཅས་པའི་ཚུལ་གྱིས་རྟོགས་པར་བྱ་བ་མ་ཡིན་པའི་ཕྱིར།
ཁ་ཅིག མཐར་ཐུག་དཔྱོད་པའི་རིགས་ཤེས་ཀྱི་དངོས་ཀྱི་རྙེད་དོན། དོན་དམ་བདེན་པའི་མཚན་ཉིད་ཟེར་ན། མཐར་ཐུག་དཔྱོད་པའི་རིགས་ཤེས་རྗེས་དཔག་གི་གཞལ་བྱ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། མཐར་ཐུག་དཔྱོད་པའི་རིགས་ཤེས་རྗེས་དཔག་དེས། ཁྱོད་དངོས་སུ་རྟོགས་པའི་ཕྱིར། མ་གྲུབ་ན། མཐར་ཐུག་དཔྱོད་པའི་རིགས་ཤེས་རྗེས་དཔག་ཆོས་ཅན། ཁྱོད་ཀྱིས་རང་གི་གཞལ་བྱ་དངོས་སུ་རྟོགས་པས་ཐལ། ཁྱོད་རྟོག་པ་ཚད་མ་ཡིན་པའི་ཕྱིར། རྩ་བ་འདོད་ན། ཐེག་ཆེན་མཐོང་ལམ་བར་ཆད་མེད་ལམ་པའི་གཞལ་བྱ་དོན་དམ་བདེན་པ་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། ཐེག་ཆེན་མཐོང་ལམ་བར་ཆད་མེད་ལམ་དེ་དེའི་གཞལ་བྱ་ཡིན་པའི་ཕྱིར།
གཞན་ཡང་། བདག་མེད་ཀྱི་དོན་སྤྱི་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། བདག་མེད་རྟོགས་པའི་རིགས་ཤེས་རྗེས་དཔག་གི་དངོས་ཀྱི་རྣེད་དོན་ཡིན་པའི་ཕྱིར། དེའི་དངོས་ཀྱི་ཡུལ་ཡིན་པའི་ཕྱིར། དེའི་གཞལ་བྱ་ཡིན་པའི་ཕྱིར། ཕྱི་མ་དེར་ཐལ། དེའི་སྣང་ཚུལ་གྱི་གཞལ་བྱ་ཡིན་པའི་ཕྱིར་ཏེ། དེ་ཡོད་པའི་ཕྱིར།
ཁ་ཅིག ཇི་སྙེད་པ་མཁྱེན་པའི་རྣམ་མཁྱེན་གྱིས་གཉིས་སྣང་དང་བཅས་པའི་སྒོ་ནས་རྟོགས་པར་བྱ་བ་ཀུན་རྫོབ་བདེན་པའི་མཚན་ཉིད་ཟེར་ན། ཇི་སྙེད་པ་རྟོགས་པའི་རྣམ་མཁྱེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོས་ན། དེ་ཆོས་ཅན། ཁྱོད་ཀྱིས་ཇི་སྙེད་པ་མཁྱེན་པའི་རྣམ་མཁྱེན་དེ། ཁྱོད་རང་ལས་ཐ་དད་པའི་ཚུལ་གྱིས་རྟོགས་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཁྱོད་ཇི་སྙེད་པ་མཁྱེན་པའི་རྣམ་མཁྱེན་དང་ཐ་དད་ཡིན་པར་ཐལ། འདོད་པའི་ཕྱིར། འདོད་མི་ནུས།
ཁ་ཅིག ཀུན་རྫོབ་བདེན་པ་གཞིར་བྱས་ལ། སོ་སྐྱེའི་མངོན་སུམ་ལ་སྣང་བ་ལྟར་དོན་བྱེད་ནུས་པ་དེ་ཡང་དག་ཀུན་རྫོབ་ཀྱི་མཚན་ཉིད་ཟེར་ན། ལོངས་སྐུ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེའི་འཁོར་དུ་གྱུར་པའི་སོ་སྐྱེ་ཡོད་པར་ཐལ། འདོད་པའི་པ་ཕྱིར། འདོད་མི་ནུས།
ཡང་ཁ་ཅིག མངོན་སུམ་དུ་སྣང་བ་ལྟར་དོན་བྱེད་ནུས་པའི་ཀུན་རྫོབ་པར་དམིགས་པ་དེ་ཡང་དག་ཀུན་རྫོན་གྱི་མཚན་ཉིད་ཟེར་ན། གང་ཟག་གི་བདག་མེད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས།
ཁ་ཅིག མཐར་ཐུག་དཔྱོད་པའི་རིགས་ཤེས་ཀྱི་རྙེད་དོན་ཡིན་ན་དེའི་དཔྱད་བཟོད་ཡིན་པའི་ཁྱབ་ཟེར་ན། མི་འཐད་པར་ཐལ། དེའི་དཔྱད་བཟོད་ཚད་མས་ཁེགས་པའི་ཕྱིར།
གཉིས་པ་རང་ལུགས་ནི།
- རང་མངོན་སུམ་དུ་རྟོགས་པའི་མངོན་སུམ་ཚད་མས་གཉིས་སྣང་ནུབ་པའི་ཚུལ་གྱིས་རྟོགས་པར་བྱ་བ་གང་ཞིག སྒྲུབ་པའི་རྣམ་པར་རྟོགས་བྱ་མ་ཡིན་པ་དེ། རང་ཉིས་དོན་དམ་བདེན་པའི་མཚན་ཉིད།
- དེ་ལ། ཡིན་ཚུལ་གྱི་སྒོ་ནས་དབྱེ་ན།
- ནང་སྟོང་པ་ཉིད་ལ་སོགས་པ་སྟོང་ཉིད་བཅུ་དྲུག་གམ་ཉི་ཤུར་ཡོད།
- སྒྲས་ནརྗོད་རིགས་ཀྱི་སྒོ་ནས་དབྱེ་ན།
- ཡུལ་གྱི་དོན་དམ་བདེན་པ། བུམ་པ་བདེན་སྟོང་ལྟ་བུ།
- ཡུལ་ཅན་གྱི་དོན་དམ་བདེན་པ། བུམ་པ་བདེན་སྟོང་དེ་མངོན་སུམ་དུ་རྟོགས་པའི་མཉམ་གཞག་ཡེ་ཤེས་ལྟ་བུ།
- རང་མངོན་སུམ་དུ་རྟོགས་པའི་མངོན་སུམ་ཚད་མས་གཉིས་སྣང་དང་བཅས་པའི་ཚུལ་གྱིས་རྟོགས་པར་བྱ་བའི་རིགས་སུ་གནས་པ་དེ། རང་ཉིས་ཀུན་རྫོབ་བདེན་པ་ཡིན་པའི་མཚན་ཉིད། དང་པ་ལ། ཡིན་ཚུལ་གྱིན་པ་དང་། ཡུལ་ཅན་གྱི་དོན་དམ་བདེན་པ་གཉིས། དང་པོ་ནི། བུམ་པ་བདེན་སྟོང་ལྟ་བུ། གཉིས་པ་ནི། དེ་མངོན་སུམ་དུ་རྟོགས་པའི་མཉམ་གཞག་ཡེ་ཤེས་ལྟ་བུ། དེ་ལ་ཡིན་ཙུལ་གྱི་སྒོ་ནས་དབྱེ་ན།
- ཡང་དག་ཀུན་རྫོབ། ཀུན་རྫོབ་བདེན་པ་གང་ཞིག རང་སྣང་ཡུལ་དུ་བྱེད་པའི་བློ་ལ་སྣང་བ་ལྟར་གྲུབ་པའི་རིགས་སུ་གནས་པ་དེའི་མཚན་ཉིད། མཚན་གཞི་ནི་ཤེས་པ་ལྟ་བུ།
- ལོག་པའི་ཀུན་རྫོབ། ཀུན་རྫོབ་བདེན་པ་གང་ཞིག རང་སྣང་ཡུལ་དུ་བྱེད་པའི་བློ་ལ་སྣང་བ་ལྟར་མ་གྲུབ་པའི་རིགས་སུ་གནས་པ་དེའི་མཚན་ཉིད། མཚན་གཞི་ནི་མེ་ལོང་གི་གཟུགས་བརྙན་ལྟ་བུ།
________________________________________________
རྒྱལ་དབང་སྐུ་ཕྲེང་ལྔ་པ་ངག་དབང་བློ་བཟང་རྒྱ་མཚོའི་ཕར་ཕྱིན་བློ་བཟང་དགོངས་རྒྱན་གདོང་ལྔའི་དབང་པོའི་སྒྲ་དབྱངས་ལས་ཤོག་གྲངས་ ༡༠༠ ནས་
No comments:
Post a Comment